اسلام آباد(محب) قومی کرکٹ ٹیم کے وکٹ کیپر بیٹر محمد رضوان کو پریزیڈنٹ ٹرافی میں شرکت سے روک دیے جانے کا انکشاف ہوا ہے۔ ذرائع کے مطابق پاکستان کرکٹ بورڈ (پی سی بی) کی ہدایت پر محمد رضوان کو ان کے ڈیپارٹمنٹ سے واپس بھیج دیا گیا۔
ذرائع کے مطابق محمد رضوان نے پریزیڈنٹ ٹرافی میں شرکت کے لیے اسلام آباد میں اپنے ڈیپارٹمنٹ کو جوائن کیا تھا، جہاں شان مسعود کی عدم موجودگی میں انہیں ٹیم کا کپتان مقرر کیا گیا۔ رضوان نے ٹیم کے پریکٹس سیشن اور میٹنگ میں بھی شرکت کی۔
ذرائع کا کہنا ہے کہ اسی روز پی سی بی نے ڈیپارٹمنٹ انتظامیہ سے رابطہ کرکے ہدایت کی کہ محمد رضوان کے خلاف انکوائری جاری ہے، اس لیے انہیں ٹیم سے واپس بھیج دیا جائے۔
ذرائع کے مطابق اسلام آباد سے لاہور واپسی کے بعد محمد رضوان نے نیشنل کرکٹ اکیڈمی میں پریکٹس کی اجازت کے لیے پی سی بی کے ایک اعلیٰ عہدیدار سے رابطہ کیا، تاہم انہیں این سی اے میں پریکٹس کی اجازت نہیں دی گئی۔
نیشنل کرکٹ اکیڈمی میں پریکٹس کی اجازت نہ ملنے کے بعد محمد رضوان نے پشاور میں پریکٹس شروع کردی ہے۔
ذرائع نے مزید بتایا کہ دورہ انگلینڈ سے واپس آنے والے کسی بھی کھلاڑی کا متعلقہ ڈیپارٹمنٹ کی جانب سے پریزیڈنٹ ٹرافی کے لیے فٹنس ٹیسٹ نہیں لیا گیا۔
محمد رضوان کو پریزیڈنٹ ٹرافی میں شرکت سے روکے جانے اور ان کے خلاف جاری انکوائری کے معاملے پر پی سی بی کا باضابطہ مؤقف تاحال سامنے نہیں آیا۔
