این سی اے کے مطابق، اسمگلنگ گروہ کے ارکان تھائی لینڈ سے پیرس کے چارلس ڈیگال ایئرپورٹ کے راستے برطانیہ پہنچے تھے۔ بنکاک ایئرپورٹ پر سوٹ کیسوں کے اضافی وزن کے باعث انہیں اضافی سامان کی فیس بھی ادا کرنا پڑی، جس سے تفتیش کاروں کو اس گروہ کے سفر اور سامان کے بارے میں مزید سراغ ملے۔ برمنگھم ایئرپورٹ پر کسٹمز حکام نے مشتبہ مسافروں کی جانچ کی تو ہر ملزم کے دو سوٹ کیسوں سے کپڑوں کے نیچے ویکیوم پیک کی گئی بھنگ برآمد ہوئی۔ آٹھ سوٹ کیسوں میں ایپل ایئر ٹیگ ٹریکرز بھی نصب تھے، جو ایک ہی ایپل آئی ڈی اکاؤنٹ سے منسلک پائے گئے۔
نسل پرستانہ گالیاں اور بدتمیزی: نیویارک سے اٹلانٹا جانے والی پرواز سے مسافر گرفتار
برمنگھم کراؤن کورٹ نے جیدن ریمن کو 32 ماہ، پیج کرسپ کو 30 ماہ، جبکہ گیڈین اولواسیتیمی اولومویگن اور ریان بوآچی کو 24، 24 ماہ قید کی سزا سنائی۔ کلیئر مک کلو کو 24 ماہ قید کے علاوہ مزید دو ماہ کی سزا سنائی گئی۔ این سی اے کے مطابق، اس کارروائی میں مجموعی طور پر 11 افراد گرفتار ہوئے تھے، جبکہ تاشیا نیلسن اور جمال کلارک کو 30 اکتوبر کو سزا سنائی جائے گی۔ گروہ کے دیگر چار ارکان کو بھی اسی مقدمے سے متعلق کارروائی میں 21 ستمبر کو سزائیں سنائی جا چکی ہیں۔
این سی اے کے سینئر تفتیشی افسر پال بونیفیس نے کہا کہ یہ مقدمہ دیگر اسمگلروں کے لیے تنبیہ ہے کہ ایسے جرائم کی قیمت بہت بھاری پڑ سکتی ہے۔ ان کے مطابق، مجرموں کو قید کے ساتھ ایسی سزاؤں کا سامنا بھی کرنا پڑ سکتا ہے جو ان کے مستقبل کے روزگار اور بیرون ملک سفر کے امکانات کو شدید متاثر کریں۔ ادارے نے کہا کہ وہ برطانیہ میں منشیات کی اسمگلنگ روکنے اور جرائم پیشہ گروہوں کے منافع کو ختم کرنے کی کوششیں جاری رکھے گا۔
