اسلام آباد(روشن پاکستان نیوز) محکمہ موسمیات نے ملک کے بیشتر علاقوں میں موسم سرد اور خشک جبکہ پہاڑی علاقوں میں صبح اور رات کے اوقات میں شدید سرد رہنے کی پیشگوئی کی ہے۔

پنجاب اور خیبر پختونخوا کے میدانی علاقوں میں دھند اور اسموگ پڑنے کا امکان ہے، ملک میں سب سے کم درجہ حرارت اسکردو میں منفی 10ریکارڈ کیا گیا، گلگت بلتستان اور قلات میں درجہ حرارت منفی 6 ریکارڈ کیا گیا۔

مزید پڑھیں: بارشیں اور برفباری، آغاز کب سے ہو گا؟ پیشگوئی سامنے آ گئی

محکمہ موسمیات کے مطابق اگلے 2 روز کے دوران بالائی علاقوں میں رات کے درجہ حرارت میں مزید کمی کا امکان ہے۔

محکمہ موسمیات نے پانچ دسمبر سے گلگت بلتستان، بالائی خیبر پختونحوا اور کشمیر میں تیز ہواؤں کے ساتھ مختلف مقامات پر بارش اور پہاڑوں پر برفباری کا امکان ظاہر کیا ہے۔

چھ دسمبر کو گلگت بلتستان، بالائی خیبر پختونحوا اور کشمیر میں بارش اور برفباری جبکہ سات دسمبر کو گلگت بلتستان میں بارش اور پہاڑوں پر برفباری کی توقع ہے۔