اسلام آباد (روشن پاکستان نیوز )سینیٹر فیصل واوڈا نے کہا ہے کہ پاکستان جس صورتحال سے گزر رہا ہے ، سب کو ملکر چلنا پڑے گا، نیشنل کاز کے لیے تمام سیاسی جماعتوں سے مشاورت ضروری ہے۔
ایم کیو ایم پاکستان کے رہنمائوں سے ملاقات کے بعد مصطفیٰ کمال کے ہمراہ پریس کانفرنس کرتے ہوئے فیصل واوڈا کا کہنا تھا کہ سب کو تمام سیاسی جماعتوں کا مینڈیٹ تسلیم کرنا ہو گا، بانی پی ٹی آئی کے مینڈیٹ کو بھی تسلیم کرنا پڑے گا۔
انہوں نے مزید کہا کہ دھرنے اور لوگوں کے کیساتھ ناانصافی اب ملک برداشت نہیں کر سکتا، جب تک مل کر نہیں بیٹھیں گے ، ملک آگے نہیں چل سکے گا۔ مولانا فضل الرحمان کے جائز مطالبات پورے ہونے چاہئیں۔
ان کا کہنا تھا کہ بانی پی ٹی آئی کی اہلیہ اور ان کے حواری مولا جٹ کی سیاست کر رہے ہیں ،وزیراعلیٰ علی امین کی مولا جٹ کی سیاست زیادہ دن نہیں چلے گی۔ پی ٹی آئی کیساتھ اسٹیبلشمنٹ نے کوئی رابطہ نہیں کیا۔
فیصل واوڈا نے کہا کہ بانی پی ٹی آئی کی جان پر سیاست کرنے کی کوشش کی جا رہی ہے، بانی پی ٹی آئی کیساتھ اگر کوئی مخلص ہے تو وہ ان کی بہنیں ہیں۔
مزید پڑھیں؛کراچی میں جائیداد کے لالچ میں ماں کو قتل کرنے والا بیٹا گرفتار
اس موقع پر ایم کیو ایم کے رہنما مصطفیٰ کمال نے کہا کہ پاکستان میں ہر کوئی کہہ رہا ہے کہ میں صحیح اور دوسرا غلط ہے ، ملک میں اس وقت عدم استحکام ہے۔
مصطفیٰ کمال نے کہا کہ فیصل واوڈا ون مین آرمی ہیں ، ہر طرف چھائے ہوئے ہیں ، ہماری تمام سپورٹ فیصل واوڈا کے ساتھ ہے۔
