نئی دہلی(روشن پاکستان نیوز) بھارتی پنجاب کے مشہور آنجہانی گلوکار شبھ دیپ سنگھ سدھو المعروف سدھو موسے والا کے والد کے بیان نے مداحوں کو اُلجھن میں ڈال دیا۔
گزشتہ ماہ بھارتی میڈیا کی جانب سے یہ خبر سامنے آئی تھی کہ گلوکار سدھو موسے والا کی 58 سالہ والدہ چرن کور کے ہاں مارچ 2024 میں ننھے مہمان کی آمد متوقع ہے۔
اس خبر پر سدھو موسے والا کے والد کا کوئی بیان سامنے نہیں آیا تھا اور اُن کی خاموشی دیکھ کر گلوکار کے مداحوں کا کہنا تھا کہ وہ یہ خبر خفیہ رکھنا چاہتے ہیں، اسی لیے کوئی بیان نہیں دے رہے۔
تاہم، اب گلوکار کے والد نے سماجی رابطے کی ویب سائٹ فیس بُک پر جاری کی گئی اپنی پوسٹ میں کہا کہ ہم اپنے بیٹے سدھو کے تمام مداحوں کے دل سے شکرگزار ہیں جو ہمارے خاندان کے لیے فکرمند ہیں۔
اُنہوں نے پوسٹ میں مداحوں سے اپیل کرتے ہوئے کہا کہ ہمارے خاندان سے متعلق کچھ افواہیں زیرِ گردش ہیں، براہِ کرام! اُن افواہوں پر یقین نہیں کریں، اگر کوئی بھی خبر ہوگی تو ہمارا خاندان خود آپ سب کو آگاہ کرے گا۔
سدھو موسے والا کے والد کی پوسٹ کے بعد مداح سوال کررہے ہیں کہ گلوکار کی والدہ کے حاملہ ہونے کی خبر جھوٹی اور بےبنیاد ہے؟
مزید پڑھیں: بھارتی گلوکار سدھو موسے والا کا قاتل گولڈی برار دہشت گرد قرار
واضح رہے کہ خطرناک گینگسٹرز کے ہاتھوں 2022 میں قتل ہونے والے سدھو موسے والا اپنے والدین کی اکلوتی اولاد تھے، گلوکار کو گینگسٹرز نے گاڑی پر فائرنگ کرکے قتل کیا تھا، اُنہیں 30 گولیاں لگی تھیں۔
