اسلام آباد(روشن پاکستان نیوز)وزارت مذہبی امور نے اعلان کیا ہے کہ عازمین حج کے لیے لازمی تربیت کا دوسرا مرحلہ عید الفطر کے بعد شروع ہوگا۔
وزارت مذہبی امور کے چیف حج ٹرینر احمد ندیم خان نے حج کیمپوں سے آن لائن میٹنگ کی۔ اس حوالے سے ترجمان نے کہا کہ انہوں نے حج تربیتی شیڈول کو حتمی شکل دے دی ہے۔
ترجمان مذہبی امور کے مطابق وزارت کے افسران اور ماہر عملہ عازمین حج کو تربیت اور رہنمائی فراہم کریں گے۔ انتظامی امور سے آگاہ ہونا اور سفر حج کی مشکلات کو سمجھنا ضروری ہے۔
انہوں نے کہا کہ دوسرے مرحلے میں صوبوں کے بڑے شہروں میں حج ٹریننگ کا اہتمام کیا جائے گا، ملٹی میڈیا پروجیکٹرز کی مدد سے عازمین حج کی جامع تربیت مکمل کی جائے گی۔
ترجمان نے کہا کہ منیٰ ویلی ماڈل کیمپس حج تربیتی مراکز میں لگائے جائیں گے۔ تمام عازمین حج کے لیے کم از کم 2 تربیتی ورکشاپس میں شرکت لازمی ہے۔
بیرون ملک مقیم پاکستانی حج پر روانگی سے قبل حج کیمپ سے تربیت حاصل کریں گے۔ عازمین حج سے مناسک حج پر زبانی یا تحریری ٹیسٹ لینے کی تجویز ہے۔
