لاہور(روشن پاکستان نیوز) لاہور پریس کلب کے سالانہ انتخابات برائے 2026 کے غیر حتمی و غیر سرکاری نتائج سامنے آ گئے، جن میں جرنلسٹ گروپ نے واضح برتری حاصل کرتے ہوئے میدان مار لیا۔
نتائج کے مطابق جرنلسٹ پینل کے ارشد انصاری 1283 ووٹ حاصل کر کے ایک مرتبہ پھر لاہور پریس کلب کے صدر منتخب ہو گئے، جبکہ ان کے مدِ مقابل گرینڈ الائنس کے اعظم چوہدری 711 ووٹ حاصل کر سکے۔
لاہور ایئرپورٹ پرشدید دھند، فلائٹ آپریشن شدید متاثر
سینئر نائب صدر کی نشست پر جرنلسٹ پینل کے سلمان قریشی 1125 ووٹ لے کر کامیاب قرار پائے، جبکہ گرینڈ الائنس کی امیدوار صائمہ نواز 839 ووٹ حاصل کر سکیں۔
نائب صدر کے عہدے پر گرینڈ الائنس کی ناصرہ عتیق 1045 ووٹ لے کر منتخب ہوئیں، جبکہ جرنلسٹ پینل کے مدثر حسین تتلہ 882 ووٹ کے ساتھ دوسرے نمبر پر رہے۔
جنرل سیکرٹری کی نشست پر جرنلسٹ پینل کے افضال طالب 1059 ووٹ لے کر کامیاب ہوئے۔ ان کے مقابلے میں گرینڈ الائنس کے عبدالمجید ساجد نے 814 ووٹ جبکہ آزاد امیدوار اعجاز مرزا نے 103 ووٹ حاصل کیے۔
جوائنٹ سیکرٹری کے عہدے پر جرنلسٹ پینل کے عمران شیخ 1002 ووٹ لے کر منتخب قرار پائے، جبکہ گرینڈ الائنس کے رانا محمد اکرام 959 ووٹ حاصل کر سکے۔
خزانچی کے عہدے پر جرنلسٹ پینل کے سالک نواز 1035 ووٹ لے کر ایک بار پھر کامیاب رہے، جبکہ ان کے مدِ مقابل حسنین چوہدری 926 ووٹ حاصل کر سکے۔
