مری (روشن پاکستان نیوز) مری میں شدید برفانی طوفان کی پیشگوئی کر دی گئی، ڈی پی او مری ڈاکٹر محمد رضا تنویر سپرا نے ٹریول ایڈوائزری جاری کر دی۔
ڈی پی او نے کہا کہ پیر کی شام سے منگل کی شام تک مری میں شدید برفباری کا امکان ہے، سیاح اور شہری رات کے وقت مری کا سفر کرنے سے مکمل گریز کریں۔
انہوں نے کہا کہ درجہ حرارت گرنے سے سڑکوں پر برف ‘بلیک آئس'(شیشے جیسی سخت تہہ) میں بدل سکتی ہے، بلیک آئس پر گاڑی کے بریک کام کرنا چھوڑ دیتے ہیں، رات کا سفر جانی خطرے کا سبب بن سکتا ہے۔
ڈی پی او مری نے کہا کہ اندھیرے اور دھند میں برف ہٹانے والی مشینری کا کام کرنا انتہائی مشکل ہو جاتا ہے، ان کا کہنا تھا کہ ٹائروں پر ‘سنو چین’ کے بغیر کسی بھی گاڑی کو مری میں داخلے کی اجازت نہیں ملے گی۔
روانگی سے قبل گاڑی کا فیول ٹینک فل رکھیں اور مکینیکل فٹنس چیک کر لیں، بریک، وائپرز، ہیٹر اور ڈی فوگر کا درست ہونا یقینی بنائیں، برف والی سڑکوں پر رفتار کم رکھیں اور اگلی گاڑی سے 50 میٹر کا فاصلہ برقرار رکھیں۔
ملک کے مختلف علاقوں میں آج سے بارش اور برفباری کے نئے سلسلے کی پیشگوئی
ڈاکٹر رضا تنویرنے کہا کہ ہیٹر کے استعمال کے دوران شیشے کھلے رکھیں، آکسیجن کی کمی جانی نقصان کا باعث بن سکتی ہے، دھند اور برفباری میں فوگ لائٹس اور ہیزرڈ لائٹس کا استعمال یقینی بنائیں۔
شاہراہوں یا ڈھلوانوں پر گاڑی پارک نہ کریں تاکہ برف ہٹانے میں رکاوٹ نہ ہو، چیک پوسٹوں پر تعینات پولیس عملے کی ہدایات پر سختی سے عمل کریں، ڈی پی او مری نے کہا کہ کسی بھی ہنگامی صورتحال یا حادثے کی صورت میں فوری پولیس ہیلپ لائن 15پر کال کریں۔
