بنگلہ دیش(روشن پاکستان نیوز) بنگلہ دیش نے ہندو انتہا پسندوں کی جانب سے ملنے والی دھمکیوں اور سکیورٹی خدشات کے پیشِ نظر بھارت کے لیے ویزا پابندیوں میں مزید توسیع کرتے ہوئے ویزا خدمات معطل کر دی ہیں۔
خبر ایجنسی کے مطابق بنگلہ دیش نے بھارت میں مزید تین اہم سفارتی مشنز کے ویزا سیکشنز عارضی طور پر بند کرنے کا اعلان کیا ہے۔
بنگلہ دیش کی وزارت خارجہ نے اس فیصلے کی تصدیق کرتے ہوئے بتایا کہ نئی پابندیاں جمعرات سے نافذ ہو چکی ہیں۔ تازہ فیصلے کے تحت کاروباری اور ملازمت کے ویزوں کے سوا تمام اقسام کے ویزے معطل کر دیے گئے ہیں۔
دفتر خارجہ کے مطابق کولکتہ میں بنگلہ دیشی ڈپٹی ہائی کمیشن میں قونصلر اور ویزا خدمات مکمل طور پر بند کر دی گئی ہیں، جبکہ ممبئی اور چنئی میں سیاحتی سمیت دیگر تمام ویزا سہولیات بھی معطل کر دی گئی ہیں۔
مزید پڑھیں: قوانین کی خلاف ورزی پر ویزا منسوخ ہو سکتا ہے ، امریکا نے بھارتی طلبہ کو خبردار کر دیا
حکام کا کہنا ہے کہ جن بھارتی شہروں میں سفارتی مشنز کو سکیورٹی سے متعلق واقعات کا سامنا رہا، وہاں ویزا خدمات روک دی گئی ہیں اور یہ فیصلہ مکمل طور پر حفاظتی وجوہات کی بنیاد پر کیا گیا ہے۔
واضح رہے کہ اس سے قبل 22 دسمبر کو بھی بنگلہ دیش نے نئی دہلی میں اپنے ہائی کمیشن، تریپورہ کے شہر اگرتلہ میں اسسٹنٹ ہائی کمیشن اور سلی گوڑی میں قائم ویزا سینٹر میں ویزا اور قونصلر خدمات عارضی طور پر معطل کر دی تھیں۔
