اسلام آباد (روشن پاکستن نیوز) پاکستان پیپلز پارٹی کی سینئر رہنما اور رکنِ قومی اسمبلی سحر کامران نے پارٹی کے 58ویں یومِ تاسیس پر پوری قوم اور پیپلز پارٹی کے کارکنان کو مبارک باد پیش کی ہے۔ اپنے خصوصی پیغام میں انہوں نے کہا کہ قائدِ عوام ذوالفقار علی بھٹو شہید نے آج سے 58 سال قبل ایک حقیقی عوامی جماعت کی بنیاد رکھی، جو آج بھی عوام کے حقوق، جمہوریت اور مساوات کے لیے سرگرمِ عمل ہے۔
سحر کامران نے کہا کہ آج کا دن پیپلز پارٹی کے کارکنوں کے لیے تجدیدِ عہد کا دن ہے۔ “روٹی، کپڑا اور مکان صرف ایک نعرہ نہیں بلکہ عوامی فلاح اور معاشی بحالی کا مکمل پروگرام ہے،” انہوں نے کہا۔
مزید پڑھیں: پاکستان، برطانیہ تعلقات کے فروغ کیلئے پارلیمانی تبادلے اہم ہیں، سحر کامران
انہوں نے مزید کہا کہ پیپلز پارٹی کی قیادت نے ہمیشہ جمہوریت، مضبوط پاکستان اور عوامی حقوق کی جدوجہد میں لازوال قربانیاں دیں۔ “شہید ذوالفقار علی بھٹو نے قوم کو متفقہ آئین دیا اور پاکستان کے دفاع کو ناقابلِ تسخیر بنایا۔ محترمہ بینظیر بھٹو شہید نے بھی اسی مشن کو جاری رکھتے ہوئے اپنی جان کا نذرانہ پیش کیا۔”
سحر کامران نے کہا کہ پیپلز پارٹی واحد حقیقی جمہوری جماعت ہے جس کا منشور صرف عوام کے لیے ہے۔
انہوں نے قائدِ عوام شہید ذوالفقار علی بھٹو کی سیاسی بصیرت کو خراجِ عقیدت پیش کرتے ہوئے کہا کہ چیئرمین بلاول بھٹو زرداری کی قیادت میں پیپلز پارٹی آج بھی اپنے شہداء کے نقشِ قدم پر گامزن ہے۔
انہوں نے یقین دہانی کرائی کہ پیپلز پارٹی اپنے عوامی منشور اور قربانیوں کی روایت پر کل کی طرح آج بھی ثابت قدم ہے۔
