اسلام آباد(عرفان حیدر) اینٹی نارکوٹکس فورس (اے این ایف) نے ملک کے مختلف شہروں میں منشیات اسمگلنگ کے خلاف بڑی کارروائیاں کرتے ہوئے خاتون سمیت 7 ملزمان کو گرفتار کر لیا۔ مجموعی طور پر 68 لاکھ روپے سے زائد مالیت کی 27 کلوگرام سے زائد منشیات برآمد کی گئی ہیں۔
اے این ایف کے مطابق یہ کامیابیاں سات مختلف کارروائیوں کے دوران حاصل کی گئیں، جن میں ایئرپورٹس، انٹرچینجز، اور رہائشی علاقوں کو نشانہ بنایا گیا۔
اسلام آباد ایئرپورٹ پر دبئی جانے والے ایک مسافر کے پیٹ سے 630 گرام وزنی 85 عدد ہیروئن بھرے کیپسولز برآمد کیے گئے۔ ملزم کو گرفتار کر کے مقدمہ درج کر لیا گیا ہے۔
باچا خان ایئرپورٹ پشاور پر سعودی عرب جانے والے ایک مسافر کے سامان سے 500 گرام چرس برآمد کی گئی۔ اس ملزم کو بھی موقع پر گرفتار کر لیا گیا۔
مزید پڑھیں: اے این ایف کا ملک بھر میں منشیات فروشوں کے خلاف کریک ڈاؤن، 96 کلوگرام منشیات برآمد
سیال موڑ انٹرچینج کے قریب ایک گاڑی سے 10 کلوگرام آئس برآمد کی گئی، جس میں ملوث دو ملزمان کو گرفتار کر کے تحقیقات کا آغاز کر دیا گیا۔
شیر شاہ ٹول پلازہ ملتان کے قریب ایک موٹر سائیکل سوار کے قبضے سے 4.8 کلوگرام چرس اور 1 کلوگرام آئس برآمد کی گئی۔
موٹروے ٹول پلازہ اسلام آباد کے قریب ایک مسافر سے 4 کلوگرام افیون برآمد ہوئی، جس پر اسے گرفتار کر لیا گیا۔
اسی مقام پر خاتون مسافر کے قبضے سے 5 کلوگرام آئس بھی برآمد ہوئی، جسے حراست میں لے لیا گیا ہے۔
جبکہ فیصل آباد کے قریب ایک گھر اور گاڑی سے 2 کلوگرام آئس برآمد ہوئی ہے۔
تمام ملزمان کے خلاف انسداد منشیات ایکٹ کے تحت مقدمات درج کر کے قانونی کارروائی کا آغاز کر دیا گیا ہے۔ اے این ایف ترجمان کے مطابق ملک بھر میں منشیات فروشوں اور اسمگلروں کے خلاف کریک ڈاؤن جاری رہے گا۔
