اشک آباد (روشن پاکستان نیوز) — پاکستان انٹرنیشنل ایئرلائن (پی آئی اے) کا ایک خصوصی ایئربس A320 طیارہ ترکمانستان کے دارالحکومت اشک آباد پہنچ گیا ہے، جہاں سے وہ ایران سے ترکمانستان آنے والے پاکستانی شہریوں کو وطن واپس لائے گا۔
ذرائع کے مطابق، یہ خصوصی پرواز حکومت پاکستان کی ہدایت پر بھیجی گئی ہے تاکہ ایران میں موجود پاکستانی شہریوں کی واپسی کو یقینی بنایا جا سکے، جو حالیہ دنوں میں مختلف زمینی راستوں سے ترکمانستان پہنچے تھے۔
سفارتی ذرائع کے مطابق، اشک آباد میں پاکستانی سفارتخانہ مقامی حکام کے تعاون سے وطن واپسی کے اس عمل کو مربوط کر رہا ہے۔ تمام مسافروں کی اسکریننگ اور ضروری طبی معائنہ مکمل کیا جا چکا ہے تاکہ پرواز کے دوران صحت و سلامتی کے اصولوں پر مکمل عملدرآمد کیا جا سکے۔
پی آئی اے کے ترجمان کے مطابق، اس طرح کی مزید خصوصی پروازیں بھی ممکنہ ضرورت کے مطابق بھیجی جا سکتی ہیں تاکہ بیرونِ ملک پھنسے پاکستانیوں کی محفوظ واپسی کو یقینی بنایا جا سکے۔
مزید پڑھیں: بھارتی طیارہ حادثے میں زندہ بچ جانے والے مسافر کا بیان سامنے آگیا
یہ اقدام حکومت پاکستان کے اس عزم کا حصہ ہے کہ بیرون ملک موجود پاکستانیوں کی ہر ممکن مدد کی جائے، خصوصاً ایسے حالات میں جب سفری مشکلات اور غیر یقینی کی صورتحال درپیش ہو۔
