نیودہلی(روشن پاکستان نیوز) ایشیا کپ میں پاک بھارت میچ پر پابندی کیلئے بھارتی سپریم کورٹ میں درخواست دائر کر دی گئی ہے۔
بھارتی میڈیا رپورٹس کے مطابق سپریم کورٹ میں ایک درخواست دائر کی گئی ہے جس میں 14 ستمبر کو بھارت اور پاکستان کے درمیان ہونے والے ایشیا کپ کرکٹ میچ پر پابندی لگانے اور اسے غیر آئینی قرار دینے کی استدعا کی گئی ہے۔
درخواست پونے کے سماجی کارکن کیتن تیرودکر کی جانب سے دائر کی گئی، جس میں مؤقف اختیار کیا گیا ہے کہ دونوں ممالک کے درمیان حالیہ جنگ کے پیش نظر بھارت اور پاکستان کے درمیان میچز نہیں کھیلے جانے چاہئیں۔
درخواست میں مزید کہا گیا ہے کہ یہ میچ آئین کے آرٹیکل 21 کی خلاف ورزی ہے، جو بھارتی شہریوں کے لیے زندگی اور ذاتی آزادی کے حق کی ضمانت دیتا ہے۔
بھارتی میڈیا کے مطابق درخواست پر سماعت 12 ستمبرکو چیف جسٹس آف انڈیا کی سربراہی میں بینچ کے سامنے ہوگی۔
قبل ازیں بھارتی کرکٹ بورڈ (بی سی سی آئی) کے سیکریٹری دیوجیت سائیکیا نے ایشیا کپ میں پاکستان کے خلاف کھیلنے پر وضاحت دیتے ہوئے کہا تھا کہ بھارت کی بین الاقوامی مقابلوں میں شرکت حکومتی پالیسی کے مطابق ہوتی ہے۔
مزید پڑھیں: سپریم کورٹ کے 4 ججز کا چیف جسٹس کو خط، عدالتی رولز کی سرکولیشن کے ذریعے منظوری پر تحفظات
انہوں نے واضح کیا کہ ایسی کسی بھی ٹورنامنٹ میں شرکت سے انکار ممکن نہیں جس میں کئی ممالک شریک ہوں، بھارت کی حالیہ پالیسی کے مطابق کسی بھی بین الاقوامی یا کثیرالملکی ٹورنامنٹ میں ان ممالک کیخلاف کھیلنے پر کوئی پابندی نہیں ہے۔
دیوجیت سائیکیا کے مطابق جن کے ساتھ بھارت کے سیاسی تعلقات کشیدہ ہوں، بی سی سی آئی مرکزی حکومت کی ہدایات کی مکمل پیروی کرتا ہے، ایشیا کپ ایک ملٹی نیشن ٹورنامنٹ ہے اور بھارت اس میں مکمل شرکت کرے گا۔
اسی اصول کے تحت بھارت آئی سی سی کے تحت ہونے والے دیگر ایونٹس میں بھی پاکستان سمیت تمام ٹیموں کے خلاف میچزکھیلے گا،انہوں نے کہا کہ دوطرفہ سیریز میں بھارت کسی دشمن ملک سے نہیں کھیلے گا۔
انہوں نے مزید کہا کہ اگر بھارت کسی ملک کے خلاف ملٹی نیشنل ایونٹ میں کھیلنے سے انکارکرے گا تو بین الاقوامی سطح پربھارتی کھیلوں کوپابندی کا سامنا ہو سکتا ہے، جس سے کھلاڑیوں کا نقصان ہو گا۔
