مانچسٹر: (روشن پاکستان نیوز) برطانیہ کے شہر مانچسٹر کے سٹی سینٹر میں چاقو زنی کے ایک واقعے میں 19 سالہ نوجوان شدید زخمی ہو گیا، جسے تشویشناک حالت میں اسپتال منتقل کر دیا گیا۔
غیر ملکی میڈیا رپورٹس کے مطابق جمعہ 31 جولائی کو دوپہر تقریباً 12:50 بجے چرچ اسٹریٹ پر جاری ایک واقعے کی اطلاع ملنے پر پولیس اور دیگر ہنگامی امدادی ادارے موقع پر پہنچے۔ پولیس کو جائے وقوعہ سے ایک 19 سالہ نوجوان ملا جس کے جسم پر چاقو کے وار کے نشانات تھے۔
زخمی نوجوان کو فوری طور پر اسپتال منتقل کیا گیا، جہاں ڈاکٹروں کے مطابق اس کی حالت تشویشناک ہے۔ واقعے کے بعد ایئر ایمبولینس اور خصوصی پولیس یونٹس بھی موقع پر پہنچے جبکہ چرچ اسٹریٹ، تھامس اسٹریٹ اور جان اسٹریٹ سمیت اطراف کے علاقوں کو گھیرے میں لے کر تحقیقات شروع کر دی گئیں۔
گریٹر مانچسٹر پولیس کا کہنا ہے کہ تاحال کسی مشتبہ شخص کو گرفتار نہیں کیا گیا، تاہم واقعے کی تحقیقات جاری ہیں۔ ابتدائی شواہد کی بنیاد پر پولیس کا مؤقف ہے کہ یہ ایک الگ تھلگ واقعہ معلوم ہوتا ہے اور اس سے عوام کو کسی وسیع خطرے کا سامنا نہیں۔
اسلام آباد میں نوجوان مبینہ طور پر اغوا، والد نے پولیس سے بازیابی کی اپیل کردی
پولیس نے شہریوں کو ہدایت کی ہے کہ تحقیقات مکمل ہونے تک علاقے میں اضافی نفری تعینات رہے گی، جبکہ ٹریفک اور پیدل آمدورفت متاثر ہو سکتی ہے، اس لیے متبادل راستے اختیار کیے جائیں۔
