اسلام آباد(روشن پاکستان نیوز )انتخابی مہم کے دوران امیدواروں کو مقررہ سائز سے بڑے پوسٹرز، پمفلٹ یا بینرز لگانے کی اجازت نہیں ہے۔الیکشن کمیشن نے سیاسی جماعتوں اور آزاد امیدواروں کے لیے نئی ہدایات جاری کردی ہیں، جن کی خلاف ورزی پر کارروائی ہوگی۔
الیکشن کمیشن کے ہدایت نامے کے مطابق پوسٹرزکی لمبائی 18 انچ اورچوڑائی 23 انچ سے زیادہ نہ ہو، ہینڈ بل، پمفلٹ اور کتابچے 9 انچ لمبے اور 6 انچ چوڑے ہوسکتے ہیں، جبکہ بینر 3 فٹ لمبا اور 9 فٹ سے زیادہ بڑا نہیں ہونا چاہیے۔اسی طرح پورٹریٹ تصویر 2 فٹ لمبی اور 3 فٹ چوڑی ہوسکتی ہے۔
الیکشن کمیشن کے مطابق ہراشتہاری مواد پر پبلشر کا نام اورپتا لکھنا لازم ہے جبکہ قرآنی آیات سمیت مذہبی مواد کی طباعت غیر قانونی ہے۔اسی طرح ہورڈنگز، بل بورڈز، وال چاکنگ اورپینافلیکس پر مکمل پابندی ہوگی۔
ہدایت نامہ کے مطابق انتخابی مہم میں سرکاری اہلکار کی تصویر لگانا غیرقانونی ہوگا، جبکہ خلاف ورزی پر امیدواروں کے ساتھ پبلشر کے خلاف بھی کارروائی ہوگی۔
