رپورٹ: شیخ اعجاز افضل

مانچسٹر: تحریک حقِ خود ارادیت کشمیر انٹرنیشنل اورچیئرپرسن آف کلچرل ونگ پامیلا ملک کے زیر اہتمام برطانیہ کے شہر مانچسٹر میں یومِ الحاقِ کشمیر کی مناسبت سے ایک پروقار شہری استقبالیہ منعقد کیا گیا، جس میں نارتھ ویسٹ انگلینڈ سے نومنتخب لارڈ میئرز، میئرز، لیڈی میئرز، کونسلرز اور دیگر منتخب بلدیاتی نمائندوں کو خراجِ تحسین پیش کیا گیا۔ تقریب کی قیادت تنظیم کے بانی چیئرمین راجہ نجابت حسین، ستارۂ پاکستان نے کی۔

تقریب میں سیاسی، سفارتی، سماجی اور کاروباری حلقوں سے تعلق رکھنے والی ممتاز شخصیات نے بڑی تعداد میں شرکت کی۔ مہمانِ خصوصی میں مانچسٹر میں پاکستان کے قونصل جنرل امتیاز فیروز گوندل، رکن برطانوی پارلیمنٹ ڈاکٹر افضل خان، صدر میرپور بار ایسوسی ایشن بابر علی خان، لارڈ میئر آف مانچسٹر کونسلر شوکت علی سمیت ٹیمسائیڈ، سالفورڈ، چیشائر ایسٹ، اولڈہم، روچڈیل، بیوری، برنلے، ہائنڈبرن، بلیک برن اور پریسٹن کے میئرز، لیڈی میئرز، سابق لارڈ میئرز، کونسلرز اور شمالی انگلینڈ بھر سے کمیونٹی رہنما شریک ہوئے۔

اس موقع پر سابق لارڈ میئر آف مانچسٹر اور چیئرپرسن انٹرنیشنل لابی آن کشمیر کونسلر یاسمین ڈار، اعزازی قونصل قازقستان و سابق لارڈ میئر مانچسٹر عابد لطیف چوہان، سابق لارڈ میئر مانچسٹر کونسلر نعیم الحسن، سابق لارڈ میئر اسٹوک آن ٹرینٹ کونسلر مجید خان، سابق لارڈ میئر بریڈفورڈ راجہ غضنفر خالق، لیڈر ہائنڈبرن کونسل کونسلر منصف داد اور دیگر منتخب نمائندوں نے بھی شرکت کی۔

جے کے ایس ڈی ایم آئی کی نمائندگی سرپرست سردار عبد الرحمن خان، چیئرپرسن برطانیہ کونسلر نائلہ شریف، چیئرپرسن گریٹر مانچسٹر روبینہ خان، جنرل سیکرٹری راجہ جاوید طارق، انفارمیشن سیکرٹری یاسمین عالم، پروفیسر ڈاکٹر تیمور شفیق، حسنین ظفر، نورین شہزاد ایشٹن، راجہ عاشق حسین، حاجی محمد اسلم، ڈاکٹر محمد یونس پرویز، چوہدری محمد بشیر رتوی، چوہدری نثار اقبال، راجہ مقصود کاکروی، راجہ شبیر کاکروی، راجہ اظہر خان، عبدالقادر، راجہ خالد خالق، راجہ انور احمد، مفتی کامران حبیب، ہارون افضل کھٹانہ، چوہدری مسرت علی، اشتیاق احمد، خواجہ جاوید، چوہدری زراحت علی، راجہ عارف خان، کونسلر عثمان عارف اور دیگر معززین نے کی۔

تقریب کا آغاز کونسلر یاسمین ڈار اور کونسلر نائلہ شریف کے خیرمقدمی کلمات سے ہوا۔ انہوں نے نومنتخب لارڈ میئرز، میئرز اور کونسلرز کو مبارکباد پیش کرتے ہوئے ان کی عوامی خدمات اور کمیونٹی کی فلاح و بہبود کے لیے کردار کو سراہا۔

اپنے خطاب میں راجہ نجابت حسین نے 19 جولائی 1947ء کو غازیٔ ملت سردار محمد ابراہیم خان کی رہائش گاہ پر منظور ہونے والی قراردادِ الحاقِ کشمیر کی تاریخی اہمیت پر روشنی ڈالی۔ انہوں نے کہا کہ یہ قرارداد کشمیری عوام کی سیاسی امنگوں اور حقِ خود ارادیت کی جدوجہد کی اہم علامت ہے۔ انہوں نے آزاد جموں و کشمیر کی بانی قیادت اور ان رہنماؤں کو خراجِ عقیدت پیش کیا جنہوں نے مشکل حالات میں کشمیری عوام کے جمہوری حقوق کے لیے تاریخی کردار ادا کیا۔

پاکستان کے قونصل جنرل امتیاز فیروز گوندل نے حکومتِ پاکستان اور پاکستانی عوام کی جانب سے نومنتخب بلدیاتی نمائندوں کو مبارکباد دیتے ہوئے کہا کہ مقامی حکومتوں کے منتخب نمائندے کمیونٹیز کی ترقی، عوامی خدمت اور بین الثقافتی ہم آہنگی کے فروغ میں اہم کردار ادا کرتے ہیں۔

چیئرپرسن انٹرنیشنل لابی آن کشمیر کونسلر یاسمین ڈار نے اپنے خطاب میں کہا کہ راجہ نجابت حسین کی قیادت میں جے کے ایس ڈی ایم آئی نے برطانوی ارکانِ پارلیمنٹ، سفارت کاروں اور دیگر منتخب نمائندوں کے ساتھ مؤثر روابط قائم کرکے مسئلۂ کشمیر کو مقامی، قومی اور بین الاقوامی سطح پر اجاگر کرنے میں نمایاں کردار ادا کیا ہے۔

رکن برطانوی پارلیمنٹ ڈاکٹر افضل خان نے تقریب کے شرکاء کو خوش آمدید کہتے ہوئے جے کے ایس ڈی ایم آئی اور راجہ نجابت حسین کو کامیاب تقریب کے انعقاد پر مبارکباد دی۔ انہوں نے کہا کہ اس تقریب نے برطانوی پاکستانی، کشمیری کمیونٹی اور مقامی بلدیاتی قیادت کو ایک پلیٹ فارم پر جمع کرکے باہمی روابط کو مزید مضبوط بنانے میں اہم کردار ادا کیا ہے۔

تقریب کے دوران تحریک حقِ خود ارادیت کشمیر انٹرنیشنل نے اس عزم کا اعادہ کیا کہ وہ مسئلۂ کشمیر کو عالمی سطح پر اجاگر کرنے، منتخب عوامی نمائندوں اور پالیسی سازوں کے ساتھ روابط کو مزید مستحکم بنانے اور جموں و کشمیر کے عوام کے لیے امن، انصاف اور جمہوری حقوق کے فروغ کی کوششیں جاری رکھے گی۔

تقریب کے اختتام پر ایک خصوصی تقریبِ اعزاز منعقد کی گئی، جس میں راجہ نجابت حسین، سردار عبد الرحمن خان، کونسلر یاسمین ڈار، کونسلر نائلہ شریف اور قونصل جنرل امتیاز فیروز گوندل نے لارڈ میئر آف مانچسٹر، میئرز، لیڈی میئرز اور دیگر بلدیاتی شخصیات کو عوامی خدمت، سماجی ہم آہنگی اور جمہوری اقدار کے فروغ میں ان کی نمایاں خدمات کے اعتراف میں جے کے ایس ڈی ایم آئی کی یادگاری شیلڈز پیش کیں۔