لیڈز (روشن پاکستان نیوز): برطانیہ کے شہر لیڈز میں خواتین کی امن پسند تنظیم لیڈز ویمن اِن بلیک نے غزہ کی صورتحال پر احتجاجی مہم کے دوران فلسطینی عوام سے اظہارِ یکجہتی کرتے ہوئے فوری جنگ بندی، انسانی امداد کی بلا رکاوٹ فراہمی اور بین الاقوامی قوانین پر عملدرآمد کا مطالبہ کیا ہے۔
تنظیم کی جانب سے جاری بیان میں کہا گیا کہ غزہ میں جاری جنگ کے باعث بڑے پیمانے پر جانی و مالی نقصان ہوا ہے، جبکہ شہری آبادی، خصوصاً خواتین اور بچوں، کو شدید انسانی بحران کا سامنا ہے۔ بیان میں الزام عائد کیا گیا کہ امدادی سامان کی فراہمی میں رکاوٹیں پیدا کی جا رہی ہیں اور فلسطینی شہریوں کو بنیادی ضروریات سے محروم رکھا جا رہا ہے۔
بیان میں مغربی کنارے میں فلسطینیوں کے گھروں کی مسماری، اسرائیلی آبادکاری اور فلسطینی قیدیوں کی صورتحال پر بھی تشویش کا اظہار کرتے ہوئے عالمی برادری سے مؤثر اقدامات کا مطالبہ کیا گیا۔
فرانس نے غزہ فلوٹیلا کے سماجی کارکنوں سے اسرائیلی بدسلوکی پر جنگی جرائم کا مقدمہ شروع کردیا
تنظیم نے برطانوی حکومت سے اپنی مشرقِ وسطیٰ پالیسی پر نظرثانی کرنے اور انسانی حقوق و بین الاقوامی قانون کے تحفظ کے لیے عملی اقدامات اٹھانے کی اپیل کی۔
لیڈز ویمن اِن بلیک نے عوام سے فلسطینی عوام سے یکجہتی، انسانی امدادی منصوبوں کی معاونت اور پرامن احتجاجی سرگرمیوں میں شرکت کی بھی اپیل کی۔ تنظیم کے مطابق اس کے خاموش احتجاجی اجتماعات ہر منگل دوپہر ڈورٹمنڈ اسکوائر، لیڈز میں منعقد ہوتے ہیں۔
نوٹ: یہ خبر لیڈز ویمن اِن بلیک کے جاری کردہ بیان پر مبنی ہے۔ اس میں شامل دعوے اور مؤقف متعلقہ تنظیم کے ہیں اور ان پر مختلف فریقین کے الگ مؤقف موجود ہیں۔
