اسلام آباد(عرفان حیدر) انسدادِ منشیات فورس (اے این ایف) نے ملک کے مختلف شہروں میں منشیات اسمگلنگ کے خلاف کریک ڈاؤن کرتے ہوئے چار کامیاب کارروائیوں میں دو ملزمان کو گرفتار کر لیا۔ کارروائیوں کے دوران 15 کروڑ 12 لاکھ روپے سے زائد مالیت کی 1532.11 کلو گرام منشیات برآمد کی گئی۔
تفصیلات کے مطابق حاجی شاہ بس ٹرمینل، ضلع اٹک میں ایک گاڑی کی تلاشی کے دوران 960 گرام چرس برآمد کی گئی، جبکہ موقع پر موجود ملزم کو گرفتار کر لیا گیا۔
اسی طرح سٹی بائی پاس سکھر کے قریب ایک اور کارروائی میں گاڑی سے 150 گرام کوکین برآمد ہوئی، جس پر ایک ملزم کو حراست میں لے لیا گیا۔
تیسری کارروائی میں کلی شادزئی سرنان، ضلع پشین کے قریب سے 1500 کلو گرام چرس گردہ برآمد کی گئی۔
مزید پڑھیں: اے این ایف کا منشیات اسمگلنگ کے خلاف ملک گیر کریک ڈاؤن، 14 ملزمان گرفتار
چوتھی کارروائی کے دوران گوٹھ شیر خان، ضلع حب میں جھاڑیوں میں چھپائی گئی 31 کلو گرام ہیروئن برآمد کر لی گئی۔
اے این ایف حکام کے مطابق تمام کارروائیوں کے بعد انسدادِ منشیات ایکٹ 1997 کے تحت مقدمات درج کر کے مزید تحقیقات کا آغاز کر دیا گیا ہے۔ حکام کا کہنا ہے کہ منشیات کے خلاف زیرو ٹالرنس پالیسی کے تحت کارروائیاں بلا تعطل جاری رہیں گی۔
