اسلام آباد(عرفان حیدر) اینٹی نارکوٹکس فورس (اے این ایف) نے تعلیمی اداروں کے اطراف اور ملک کے مختلف شہروں میں منشیات اسمگلنگ کے خلاف مؤثر کریک ڈاؤن کرتے ہوئے 6 مختلف کارروائیوں کے دوران خاتون سمیت 3 ملزمان کو گرفتار کر لیا۔ کارروائیوں میں 23 کروڑ 13 لاکھ روپے سے زائد مالیت کی 198.15 کلوگرام منشیات برآمد کی گئی۔
تعلیمی اداروں کے قریب کارروائی
اے این ایف نے سائٹ ایریا کراچی میں ایک یونیورسٹی کے قریب کارروائی کرتے ہوئے 4.4 کلوگرام چرس برآمد کر لی۔
دیگر کارروائیاں
علامہ اقبال انٹرنیشنل ایئرپورٹ لاہور کے کارگو شیڈ میں بحرین بھیجے جانے والے ایک پارسل کی تلاشی کے دوران کپڑوں میں چھپائی گئی 122 گرام آئس برآمد کی گئی۔
کامرہ روڈ اٹک پر کارروائی کے دوران ایک خاتون کے قبضے سے 1.1 کلوگرام چرس برآمد کر کے ملزمہ کو گرفتار کر لیا گیا۔
لاہور میں ایک ہوٹل کے قریب موٹر سائیکل سوار ملزم کے قبضے سے 530 گرام ویڈ برآمد ہوئی۔
مزید پڑھیں: اے این ایف کا تعلیمی اداروں اور مختلف شہروں میں منشیات اسمگلنگ کے خلاف کریک ڈاؤن
پی ڈبلیو ڈی روڈ اسلام آباد کے قریب کارروائی میں ایک ملزم کے قبضے سے 2 گرام کوکین برآمد کی گئی۔
خوجک بائی پاس، ضلع کوئٹہ میں بڑی کارروائی کے دوران 192 کلوگرام ہیروئن برآمد کر لی گئی۔
ترجمان اے این ایف کے مطابق تمام کارروائیوں میں گرفتار ملزمان کے خلاف انسدادِ منشیات ایکٹ 1997 کے تحت مقدمات درج کر کے مزید تحقیقات کا آغاز کر دیا گیا ہے۔ اے این ایف نے منشیات کے خلاف زیرو ٹالرنس پالیسی پر عمل جاری رکھنے کے عزم کا اعادہ کیا ہے۔
