اسلام آباد(روشن پاکستان نیوز) وزیر دفاع خواجہ آصف نے کہا ہے کہ ہمیں افغان طالبان سے اچھائی کی کوئی اُمید نہیں ، اس سے بڑی کوئی حماقت نہیں ہوگی کہ ان پر اعتبار کیا جائے۔
ایک انٹرویو میں خواجہ آصف کا کہنا تھا کہ اگر ہم افغانستان میں کارروائی کریں گے تو واشگاف انداز میں کریں گے ، ہم کارروائی میں شہریوں کو نشانہ نہیں بناتے۔
انہوں نے کہا کہ ہمارے دوست چاہتے ہیں کہ خطے میں امن ہو جس سے سب کوفائدہ ہو گا اور اس کے لیے وہ بہت جلد مداخلت کریں گے۔
ان کا مزید کہنا تھا کہ افغان طالبان تنہا رہ جائیں گے جس کا نتیجہ ان کی تباہی کی صورت میں ہو گا ، دہشتگردی کی فیکٹری ختم ہو گی تو حلال روزی کمانے کے مواقع پیدا ہوں گے۔
مزید پڑھیں: افغان طالبان رجیم پاکستان کے سامنے سرینڈر، مطالبات مان لئے
خواجہ آصف نے طالبان کو مفاد پرستوں کا گروہ قرار دیتے ہوئے کہا کہ ان کی باتوں کو سنجیدہ لینا اور ان پر اعتماد کرنا بے سود ہے۔ ہماری فورسز انتہائی ڈسلپن ہیں، طالبان کا کوئی کوڈ آف کنڈکٹ نہیں۔
انہوں نے کہا کہ دنیا کے کس مذہب و معاشرے میں ایسا ہوتا ہے کہ آپ کسی سرزمین پر رہے ہوں اور وہاں خونریزی کریں، طالبان کونسی شریعت کو ماننے والے ہیں؟ یہ کس شریعت کی بات کرتے ہیں۔ افغانستان اگر بھارت کے ساتھ تعلقات رکھنا چاہتا ہے تو ضرور رکھے۔
