اسلام آباد(روشن پاکستان نیوز) انسداد دہشتگردی عدالت نے پاکستان تحریک انصاف کے رہنماؤں عمر ایوب، شیخ وقاص اکرم اور زرتاج گل کو گرفتار کرکے پیش کرنے کا حکم دے دیا۔
پی ٹی آئی رہنماؤں کے خلاف سنگجانی جلسہ کیس کی سماعت اے ٹی سی اسلام آباد میں ہوئی، عدالت نے عمر ایوب، شیخ وقاص اکرم اور زرتاج گل کے وارنٹ گرفتاری جاری کر دیئے۔
انسداد دہشتگردی عدالت کے جج طاہر عباس سپرا نے مقدمات کی سماعت کرتے ہوئے عمر ایوب کی حاضری سے استثنیٰ کی درخواست مسترد کر دی۔ جج نے ریمارکس دیے کہ یہ تمام لوگ ایک دفعہ بھی اس مقدمے میں پیش نہیں ہوئے۔
عدالت نے ہدایت کرتے ہوئے کہا کہ ملزمان کو گرفتار کرکے آئندہ سماعت پر عدالت کے روبرو پیش کریں۔
مزید پڑھیں: ایشیا کپ فائنل: پاکستان کیخلاف میچ سے قبل بھارتی کوچ کا 2 اہم کھلاڑیوں کی فٹنس پر خدشات کا اظہار
سماعت کے دوران پی ٹی آئی رہنماؤں کی جانب سے سردار محمد مصروف خان، آمنہ علی اور مرتضیٰ طوری ایڈووکیٹ عدالت میں پیش ہوئے ۔ بعد ازاں عدالت نے سماعت 20 اکتوبر تک ملتوی کر دی۔
