اسلام آباد (روشن پاکستان نیوز) انسدادِ منشیات فورس (اے این ایف) نے ملک کے مختلف شہروں میں منشیات اسمگلنگ کے خلاف بڑی کارروائیاں کرتے ہوئے مجموعی طور پر 1 کروڑ 3 لاکھ روپے سے زائد مالیت کی 177.02 کلوگرام منشیات برآمد کر لیں۔ ترجمان اے این ایف کے مطابق ان سات کارروائیوں کے دوران تین ملزمان کو گرفتار کر کے ان کے خلاف انسدادِ منشیات ایکٹ کے تحت مقدمات درج کر لیے گئے ہیں، جبکہ مزید تفتیش جاری ہے۔
راولپنڈی میں واقع ایک کوریئر آفس میں اٹک سے آسٹریلیا بھیجے جانے والے قالین میں جذب شدہ 25 کلو گرام آئس برآمد کی گئی۔ پشاور میں واقع کوریئر آفس میں بہاولنگر بھیجے جانے والے پارسل سے 120 گرام چرس جبکہ اسلام آباد کے لہتراڑ روڈ پر واقع کوریئر آفس سے کراچی کے لیے بھیجے جانے والے پارسل سے 500 گرام چرس برآمد ہوئی۔
کراچی کے علاقے موسیٰ لین لیاری میں واقع ایک گودام سے 125 کلوگرام خطرناک کیمیکل پوٹاشیم پرمینگیٹ برآمد ہوا، جہاں سے ایک ملزم کو گرفتار بھی کیا گیا۔ اسی طرح کوئٹہ کے علاقے ہزار گنجی کے قریب ایک گاڑی سے 25 کلوگرام چرس برآمد کی گئی۔
نیول اینکریج اسلام آباد کے قریب ایک گاڑی سے 150 گرام کوکین اور 370 گرام آئس برآمد ہوئی جبکہ مانسہرہ کے قریب داتا دربار کے علاقے میں ایک ملزم کے قبضے سے 530 گرام چرس قبضے میں لی گئی۔
اے این ایف کے ترجمان نے کہا ہے کہ منشیات اسمگلنگ کے خلاف کارروائیاں ملک بھر میں جاری رہیں گی اور اس مکروہ دھندے میں ملوث عناصر کے خلاف سخت اقدامات کیے جائیں گے۔
