لاہور(روشن پاکستان نیوز): صوبائی وزیر لائیو سٹاک و زراعت سید عاشق حسین کرمانی نے لائیو سٹاک کارڈ کی بروقت ڈیلیوری کے حوالے سے کسی قسم کی کوتاہی برداشت نہ کرنے کی ہدایت دی ہے۔ انہوں نے تمام ڈویژنز کے ڈائریکٹرز کو روزانہ کی بنیاد پر لائیو سٹاک کارڈ ڈلیوری سنٹرز کا دورہ کرنے کے احکامات جاری کیے ہیں اور ایسے فارمرز سے رابطہ کرنے کی ہدایت کی ہے جن کے کارڈز سنٹرز پر پہنچ چکے ہیں مگر وہ وصولی کے لیے نہیں آ رہے۔
یہ بات انہوں نے لائیو سٹاک ڈیپارٹمنٹ کے اہم اجلاس کی صدارت کرتے ہوئے کہی، جس میں وزیر اعلی پنجاب لائیو سٹاک کارڈ، جنوبی پنجاب کی دیہی بیوہ و مطلقہ خواتین میں لائیو سٹاک اثاثہ جات کی تقسیم اور دیگر منصوبوں پر پیش رفت کا جائزہ لیا گیا۔ اجلاس میں جانوروں میں منہ کھر بیماری کو کنٹرول کرنے کے لیے محکمانہ حکمت عملی و اقدامات پر بھی تبادلہ خیال کیا گیا۔
سید عاشق حسین کرمانی نے کہا کہ وزیر اعلی مریم نواز شریف کی قیادت میں پنجاب حکومت نے لائیو سٹاک کے شعبے کی ترقی کے لیے کئی منصوبوں کا آغاز کیا ہے جن کے مثبت نتائج سامنے آنا شروع ہوگئے ہیں۔ اب تک 13,451 کسانوں نے لائیو سٹاک کارڈ وصول کرلیے ہیں اور 10,990 کسانوں کے 77,627 نر بچھڑے/کٹٹرے کو ٹیگ کیا جا چکا ہے۔ پیٹس نے قرض کے لیے قبول کر لیا ہے۔
صوبائی وزیر نے مزید کہا کہ لائیو سٹاک ڈیپارٹمنٹ مویشی پال کسانوں کو لائیو سٹاک کارڈ کے تمام مراحل جیسے ٹیگنگ، ویکسینیشن اور ان سیمنیشن کے بارے میں آگاہ کرے گا تاکہ کسانوں کو کسی قسم کی پریشانی کا سامنا نہ ہو۔
انہوں نے کہا کہ جنوبی پنجاب کے 12 اضلاع میں 55 سال تک کی عمر کی دیہی خواتین کو دو سال کے دوران تقریباً 11,000 جانور تقسیم کیے جائیں گے۔ اس وقت تک پنجاب کے پانچ اضلاع میں 2,041 جانور بیوہ و مطلقہ خواتین میں تقسیم کیے جا چکے ہیں اور انہیں بینک آف پنجاب کے ذریعے کارڈ بھی فراہم کیے جا چکے ہیں۔
عاشق حسین کرمانی نے منہ کھر بیماری کے کنٹرول کے لیے حکمت عملی تیار کرنے کی ہدایت بھی کی۔ انہوں نے کہا کہ اس بیماری کے نقصانات کو کم کرنے کے لیے ویکسین کی پیداواری صلاحیت کو بڑھانے کے اقدامات کیے جائیں گے۔ انہوں نے مزید کہا کہ جن علاقوں میں اس بیماری کے کیسز سامنے آئے ہیں، وہاں 200 رنگ ویکسینیشن کی ضرورت ہے۔
صوبائی وزیر نے ڈویژنل ڈائریکٹرز کو فیمیل انیملز کی غیر قانونی قربانی روکنے، جانوروں کی ریگولر رپورٹنگ کرنے اور محکمہ کی زمینوں پر غیر قانونی قبضے و تجاوزات کو واگزار کرانے کے لیے بھی ہدایات دیں۔ ان کا کہنا تھا کہ ناقص کارکردگی دکھانے والے افسران کے خلاف سخت کارروائی کی جائے گی۔
مزید پڑھیں: پاکستان میں رمضان کے دوران زکوۃ خوروں کا بڑھتا کاروبار، غریبی میں کمی کی بجائے اضافہ
اجلاس میں سپیشل سیکرٹری لائیو سٹاک جنوبی پنجاب اصفر، ایڈیشنل سیکرٹری عثمان طاہر، ڈائریکٹر جنرلز توسیع، پروڈکشن، ریسرچ (لائیو سٹاک)، بینک آف پنجاب، پی آئی ٹی بی اور اربن یونٹ کے نمائندگان نے بھی شرکت کی۔
