اسلام آباد(روشن پاکستان نیوز) واٹس ایپ نے اپنے صارفین کے لیے ایک ساتھ 4 نئے فیچرز متعارف کرائے ہیں، جو چیٹ کے تجربے کو مزید بہتر اور دلچسپ بنائیں گے۔ کمپنی کی جانب سے ان نئے فیچرز کا اعلان ایک بلاگ پوسٹ میں کیا گیا ہے، جس میں کہا گیا ہے کہ ان اپ ڈیٹس کے ذریعے صارفین کو دوستوں اور پیاروں سے بات چیت کا مزید لطف ملے گا۔
نئے فیچرز میں کیمرا ایفیکٹس، سیلفی اسٹیکرز، کوئیکر ری ایکشنز، اور اسٹیکر پیکس شیئرنگ شامل ہیں۔
کیمرا ایفیکٹس اور فلٹرز:
اس اپ ڈیٹ کے بعد، واٹس ایپ صارفین کو چیٹس کے اندر تصاویر یا ویڈیوز کھینچنے یا بنانے پر 30 مختلف بیک گراؤنڈز، فلٹرز اور ایفیکٹس کا انتخاب ملے گا، جس سے وہ اپنے میسجز کو تخلیقی انداز میں بہتر بنا سکیں گے۔
سیلفی اسٹیکرز:
اس فیچر کے ذریعے صارفین اپنی سیلفیز کو اسٹیکر آئیکون پر کلک کر کے آسانی سے کاسٹیوم اسٹیکرز میں تبدیل کرسکیں گے۔ یہ فیچر سب سے پہلے اینڈرائیڈ صارفین کے لیے متعارف کرایا جا رہا ہے، جبکہ آئی او ایس ڈیوائسز کے صارفین کو جلد ہی یہ فیچر ملے گا۔
اسٹیکر پیکس شیئرنگ:
اب واٹس ایپ کے صارفین چیٹس کے اندر اپنے پسندیدہ اسٹیکر پیکس کو ریکومینڈ اور شیئر کر سکیں گے، جو اسٹیکرز کے استعمال کو مزید آسان اور دلچسپ بنائے گا۔
ری ایکشنز کا نیا فیچر:
صارفین اب کسی بھی میسج پر ڈبل کلک کر کے فوری طور پر ری ایکٹ کر سکیں گے۔ اس کے ساتھ ساتھ، واٹس ایپ میں اکثر استعمال ہونے والی ایموجیز بھی ری ایکشنز میں شامل کی جارہی ہیں تاکہ صارفین کو ٹائپ کیے بغیر اپنے جذبات کا اظہار کرنے میں مزید آسانی ہو۔
مزید پڑھیں:کرکٹر حسن علی کا اپنی شادی کے لیے بیوی کی قربانیوں کا انکشاف
کمپنی نے بلاگ پوسٹ میں کہا ہے کہ وہ 2025 میں مزید دلچسپ فیچرز متعارف کرانے کے لیے پرجوش ہیں۔ ان نئے فیچرز کا فائدہ صارفین کو آئندہ چند ہفتوں میں ملنا شروع ہو جائے گا۔
واٹس ایپ کے یہ نئے فیچرز چیٹنگ کے تجربے کو ایک نئی سطح پر لے جائیں گے اور صارفین کو اپنی تخلیقی صلاحیتوں کو ظاہر کرنے کا مزید موقع فراہم کریں گے۔
