اسلام آباد(روشن پاکستان نیوز) پاکستانی ٹیلی کمیونی کیشن اتھارٹی (پی ٹی اے) نے حکومت سے وی پی این (ورچوئل پرائیویٹ نیٹ ورک) کی رجسٹریشن کی ڈیڈ لائن میں مزید توسیع کی درخواست کی ہے۔ پی ٹی اے کے ذرائع کے مطابق، روزانہ 200 وی پی این رجسٹر ہو رہے ہیں، تاہم ابھی تک تمام وی پی اینز کو رجسٹر کروانا ممکن نہیں ہو سکا۔
وی پی این کی رجسٹریشن کے لیے موجودہ ڈیڈ لائن 30 نومبر تھی، لیکن پی ٹی اے نے حکومت سے درخواست کی ہے کہ اس تاریخ میں توسیع کی جائے تاکہ زیادہ سے زیادہ وی پی اینز کو رجسٹر کیا جا سکے۔ پی ٹی اے کے ذرائع نے بتایا ہے کہ ادارہ ابھی بھی مختلف اسٹیک ہولڈرز سے بات چیت کر رہا ہے اور اس عمل کو مزید آسان بنانے کی کوشش کر رہا ہے۔
مزید پڑھیں: پی ٹی اے کی جانب سے وائی فائی کو بھی سست کردیا گیا
پی ٹی اے نے اعلان کیا ہے کہ جو وی پی این رجسٹر نہیں ہوں گے، وہ دسمبر کے اوائل سے بند کر دیے جائیں گے۔ تاہم، اس وقت رجسٹریشن کی ڈیڈ لائن میں توسیع کا امکان ہے۔
پی ٹی اے کے مطابق، مختلف ادارے جیسے سوفٹ ویئر ہاؤسز، کال سینٹرز، بینک، سفارت خانے اور فری لانسرز پی ٹی اے کی آفیشل ویب سائٹ کے ذریعے اپنے وی پی این رجسٹر کروا سکتے ہیں۔ اس سہولت کا فائدہ پاکستان سوفٹ ویئر ایکسپورٹ بورڈ بھی اٹھا سکتا ہے۔ وی پی این کی رجسٹریشن کے لیے آن لائن فارم پُر کر کے بنیادی معلومات فراہم کی جا سکتی ہیں۔
