راولپنڈی(روشن پاکستان نیوز) چیف پولیس آفیسر (سی پی او) سید خالد ہمدانی کی ہدایت پر پبلک سروس گاڑیوں کی فٹنس، روٹ پرمٹ اور لائسنس چیکنگ کا عمل جاری ہے۔ سی پی او نے بتایا کہ پچھلے 29 روز کے دوران 705 ان فٹ گاڑیاں بند کی گئیں، جبکہ 5452 پبلک سروس گاڑیوں کے چالان کیے گئے۔
قانون کی خلاف ورزی کرنے پر 59 لاکھ 16 ہزار روپے کے جرمانے عائد کیے گئے۔ بغیر لائسنس گاڑی چلانے والے 464 ڈرائیوروں کے خلاف قانونی کارروائی عمل میں لائی گئی، اور غفلت کے مرتکب 27 ڈرائیوروں کے لائسنس بھی منسوخ کیے گئے ہیں۔
سی پی او نے مزید کہا کہ پبلک سروس گاڑیوں کے ڈرائیوروں اور مالکان کے خلاف 42 مقدمات درج کیے گئے ہیں۔ انہوں نے واضح کیا کہ غفلت و کوتاہی کے مرتکب گاڑیوں کے مالکان اور اڈہ منیجرز کے خلاف بھی کارروائی کی جائے گی، اور شہریوں کی زندگی کو خطرے میں ڈالنے والوں کے خلاف قانونی کارروائی کو یقینی بنایا جائے گا۔
یہ اقدامات شہریوں کی حفاظت کو یقینی بنانے کے لیے انتہائی اہم ہیں اور قانونی تقاضوں کی پاسداری میں بہتری لانے کا عزم ظاہر کرتے ہیں۔
