ویتنام (نیوز ڈیسک)ایشیاء میں رواں سال کے سب سے طاقت ور سمندری طوفان یاگی کی شمالی ویتنام میں تباہ کاریاں جاری ہیں، درجنوں افراد ہلاک، متعدد زخمی و لاپتہ ہو گئے جبکہ انفرا اسٹکچر کو بھی بڑے پیمانے پر نقصان پہنچا ہے۔ برطانوی نشریاتی ادارے کا کہنا ہے کہ شمالی ویتنام میں طوفان کے سبب مختلف واقعات میں ہلاکتوں کی تعداد 65 ہوگئی، جبکہ 750 سے زائد افراد زخمی اور 39 لاپتہ ہیں۔
میڈیا رپورٹس کے مطابق سمندری طوفان یاگی سے ویتنام میں زیادہ تر ہلاکتیں مٹی کے تودے گرنے اور سیلاب سے ہوئیں۔ شمالی ویتنام میں ایک پل گِر گیا جبکہ کئی گاڑیاں بہہ گئیں۔خبر رساں ادارے کے مطابق ویتنام میں طوفان کے بعد تقریباً 15 لاکھ افراد بجلی سے محروم ہیں۔
ویتنامی حکام کا کہنا ہے کہ اگرچہ اب طوفان کمزورہو گیا ہے لیکن مغرب کی طرف بڑھتے ہی مزید تباہی مچائے گا، اس سلسلے میں ویتنام کے ساحلی علاقوں سے تقریباً 50 ہزار افراد کو نکال لیا گیا ہے۔حکام کے مطابق ویتنام کے شمالی صوبوں میں اسکول عارضی طور پر بند کر دیے گئے ہیں۔
خبر ایجنسی کے مطابق طوفان سے متاثرہ علاقوں میں امدادی کارروائیوں میں مدد کے لیے فوج تعینات کر دی گئی ہے۔برطانوی نشریاتی ادارہ طوفان کے مطابق طوفان یاگی شمالی ویتنام کا 30 سال میں آنے والا سب سے طاقت ور طوفان ہے، جو فلپائن، چین میں تباہی مچانےکے بعد ہفتے کے روز ویتنام سے ٹکرایا تھا۔خبر ایجنسی کے مطابق سمندری طوفان یاگی، سے چین اور فلپائن میں 24 افراد ہلاک ہوئے تھے۔
