اسلام آباد(روشن پاکستان نیوز) اسلامی جمہوریہ ایران کے سرکاری ٹی وی چینل سحر ٹی وی کے پاکستان میں بیورو آفس کے ڈائریکٹر مجید ہاشمی فرا نے رمضان المبارک کے دوران پاکستان سمیت دنیا بھر کے اردو بولنے والے افراد کے لیے حسن قرأت کا عالمی مقابلہ کرانے کا اعلان کیا ہے۔
نیشنل پریس کلب اسلام آباد میں پریس کانفرنس کے دوران مجید ہاشمی فرا نے کہا کہ اس مقابلے کا مقصد نوجوانوں کو قرآن کی تعلیم سے روشناس کرانا اور اسلامی تعلیمات کی ترویج ہے۔ مقابلہ حسن قرأت میں پہلی پوزیشن حاصل کرنے والے قاری کو تین ہزار یورو، دوسرے نمبر پر آنے والے کو دو ہزار یورو اور تیسری پوزیشن حاصل کرنے والے قاری کو ایک ہزار یورو کا انعام دیا جائے گا۔ مقابلے کا انعقاد سحر ٹی وی پر براہ راست دکھایا جائے گا۔
مقابلے کے ججز میں پاکستان اور بھارت سے عالمی شہرت یافتہ قاری حضرات شامل ہوں گے۔ پاکستان سے قاری سید صداقت علی اور قاری وجاہت کو جج منتخب کیا گیا ہے۔ مجید ہاشمی فرا نے بتایا کہ اس مقابلے میں ایران سے کسی بھی شخص کو شرکت کی اجازت نہیں ہوگی۔
مقابلے میں حصہ لینے کے خواہشمند افراد موبائل نمبر 00989108994335 پر سورۃ القدر کی تلاوت کی ریکارڈنگ ویڈیو کے ذریعے واٹس ایپ کر سکتے ہیں۔ موصول ہونے والی ویڈیوز کو دیکھنے کے بعد ججز منتخب قرأت کا انتخاب کریں گے، جن کے درمیان 24 رمضان تک مقابلہ ہوگا۔ اس مقابلے کے تین مرحلے ہوں گے، جن میں سے بہترین قاری کا انتخاب کیا جائے گا۔
اس موقع پر ایرانی کلچر اتاشی مجید مشکی نے کہا کہ ایران میں قرآن کی تعلیم پر بہت کام ہو چکا ہے، انقلاب ایران سے قبل ایران میں حفاظ کرام کی تعداد بہت کم تھی لیکن اب ایران میں حفاظ کی بڑی تعداد موجود ہے۔ ایران کے تمام سرکاری اسکولوں میں ناظرہ تعلیم کو لازمی قرار دیا گیا ہے اور مساجد میں نماز فجر کے بعد قرآن کی تعلیم اور ترجمہ سکھایا جاتا ہے۔
این پی سی کے صدر اظہر جتوئی نے انقلاب ایران کی سالگرہ پر مبارکباد پیش کرتے ہوئے قرآن شناسی کی محافل کے انعقاد کو خوش آئند قرار دیا اور کہا کہ این پی سی بھی اپنے ممبران کے بچوں کے درمیان رمضان میں اس طرح کا پروگرام منعقد کرتا ہے، سحر ٹی وی کی یہ کاوش قابل تقلید ہے۔
مزید پڑھیں: گہری رنگت ماڈلنگ میں فائدہ، ٹی وی میں مشکل ہوتی، سنیتا مارشل
