اسلام آباد(روشن پاکستان نیوز) قومی بچت اسکیموں میں سرمایہ کاری کرنے والوں کیلئے منافع سے متعلق بڑی خوشخبری آگئی۔

حکومت نے قومی بچت (نیشنل سیونگز) کی مختلف بچت اسکیموں اور سرٹیفکیٹس پر شرح منافع میں اضافے کا اعلان کر دیا ہے، جس کا باضابطہ نوٹیفکیشن جاری کر دیا گیا ہے۔

نوٹیفکیشن میں بتایا گیا کہ پینشنرز اور بیواؤں کے لیے مقبول ترین بہبود اور پینشن سرٹیفکیٹ پر شرح منافع میں 12 بیسس پوائنٹس کا اضافہ کیا گیا ہے، جس کے بعد اس کا نیا ریٹ 12.72 فیصد ہو گیا ہے۔

اس کے علاوہ دیگر اسکیموں کے ریٹس میں بھی اضافہ کیا گیا ہے، جس میں ڈیفنس سیونگز سرٹیفکیٹ پر منافع میں 19 بیسس پوائنٹس اضافے کے بعد شرح 11.80 فیصد مقرر کی گئی ہے۔

اس کے علاوہ ریگولر انکم سرٹیفکیٹ پر 60 بیسس پوائنٹس کے اضافے کے ساتھ نیا ریٹ 11.76 فیصد ہوگیا۔

قومی بچت اسکیموں میں سرمایہ کاری کرنے والوں کے لیے بڑا اعلان

سپیشل سیونگز سرٹیفکیٹ پر شرح منافع میں 74 بیسس پوائنٹس کا بڑا اضافہ کیا گیا ہے، جس سے اس کا ریٹ 11.82 فیصد تک پہنچ گیا ہے۔

اسلامی بنیادوں پر سرمایہ کاری کرنے والے صارفین کے لیے سروا اسلامک ٹرم اکاؤنٹ (3 سال) پر 41 بیسس پوائنٹس اضافے کے ساتھ نیا ریٹ 11.57 فیصد، جبکہ سروا اسلامک (5 سال) پر 54 بیسس پوائنٹس اضافے کے ساتھ شرح منافع 11.70 فیصد مقرر کر دی گئی ہے۔