اسلام آباد(روشن پاکستان نیوز) خیبرپختونخوا حکومت نے صدرِ مملکت آصف علی زرداری، سابق وزیراعظم نواز شریف اور بانی پاکستان تحریکِ انصاف عمران خان سمیت اہم سیاسی اور قومی شخصیات کے ناموں پر مشتمل نمبر پلیٹس کی نیلامی کا فیصلہ کر لیا ہے۔
صوبائی وزیر برائے ایکسائز اینڈ ٹیکسیشن فخر جہاں نے نجی ٹی وی سے گفتگو کرتے ہوئے بتایا کہ فینسی اور یونیک چوائس نمبر پلیٹس کی نیلامی 27 جنوری کو نشتر ہال پشاور میں منعقد کی جائے گی۔ ان کے مطابق بولی کا آغاز 10 لاکھ روپے سے ہوگا اور سب سے زیادہ بولی دینے والے کو اپنی پسند کی سیاسی یا قومی شخصیت کے نام کی نمبر پلیٹ الاٹ کی جائے گی۔
مذاکرات چاہتے ہیں تو عمران خان سے ملاقات کروا دیں، بیرسٹر گوہر علی
فخر جہاں کا کہنا تھا کہ مرحلہ وار دیگر قومی قیادت، معروف شخصیات، مختلف علاقوں اور اقوام کے نام سے منسوب نمبر پلیٹس بھی نیلامی میں شامل کی جائیں گی۔ انہوں نے بتایا کہ گاڑی مالکان اس اقدام میں غیر معمولی دلچسپی لے رہے ہیں اور اس سے قومی خزانے کو خاطر خواہ فائدہ متوقع ہے۔
محکمہ ایکسائز اینڈ ٹیکسیشن خیبرپختونخوا کے مطابق فینسی نمبر پلیٹس کی نیلامی کے حوالے سے باقاعدہ اشتہار جاری کر دیا گیا ہے۔ شہری نیلامی میں شرکت کے لیے دستک ایپ کے ذریعے درخواستیں جمع کرا سکتے ہیں۔ درخواستیں جمع کرانے کی آخری تاریخ 26 جنوری 2026 مقرر کی گئی ہے۔
