اسلام آباد/کراچی(عرفان حیدر) اینٹی نارکوٹکس فورس (اے این ایف) نے تعلیمی اداروں کے اطراف اور ملک کے مختلف شہروں میں منشیات اسمگلنگ کے خلاف کریک ڈاؤن کرتے ہوئے 5 مختلف کارروائیوں میں 8 ملزمان کو گرفتار کر لیا۔ کارروائیوں کے دوران 68 لاکھ روپے سے زائد مالیت کی 83.94 کلوگرام منشیات برآمد کی گئی۔
اے این ایف کے مطابق تعلیمی اداروں کے قریب کارروائی کے دوران رئیس گوٹھ کراچی میں ایک یونیورسٹی کے نزدیک ملزم کے قبضے سے 3 کلوگرام آئس برآمد ہوئی۔ گرفتار ملزم نے تعلیمی اداروں کے طلبہ کو منشیات فروخت کرنے کا اعتراف بھی کیکیا۔
مزید پڑھیں: اے این ایف کا تعلیمی اداروں اور مختلف شہروں میں منشیات اسمگلنگ کے خلاف کریک ڈاؤن، خاتون سمیت 4ملزمان گرفتار
دیگر کارروائیوں میں اسلام آباد ایئرپورٹ پر دبئی جانے والے مسافر کے جوتوں سے 548 گرام چرس برآمد کر کے ملزم کو گرفتار کیا گیا۔ موٹر وے ٹول پلازہ اسلام آباد کے قریب ایک گاڑی سے 74.4 کلوگرام چرس برآمد ہوئی، جس میں 2 ملزمان گرفتار کیے گئے۔
اسی طرح غوری ٹاؤن اسلام آباد کے قریب ایک گاڑی سے 3.6 کلوگرام چرس برآمد کر کے 3 ملزمان کو گرفتار کیا گیا، جبکہ غوری ٹاؤن میں ایک اور کارروائی کے دوران ملزم کے قبضے سے 2.4 کلوگرام چرس برآمد کی گئی۔
اے این ایف کا کہنا ہے کہ تمام کارروائیوں میں انسداد منشیات ایکٹ 1997 کے تحت مقدمات درج کر کے تحقیقات کا آغاز کر دیا گیا ہے، جبکہ تعلیمی اداروں اور نوجوانوں کو منشیات سے محفوظ رکھنے کے لیے کارروائیاں مزید تیز کی جائیں گی۔
