اسلام آباد (عرفان حیدر) اینٹی نارکوٹکس فورس (اے این ایف) نے تعلیمی اداروں کے اطراف اور ملک کے مختلف شہروں میں منشیات اسمگلنگ کے خلاف مؤثر کریک ڈاؤن کرتے ہوئے 6 کارروائیوں کے دوران خاتون سمیت 4 ملزمان کو گرفتار کر لیا۔ کارروائیوں کے دوران 7 کروڑ 86 لاکھ روپے سے زائد مالیت کی 304.33 کلوگرام منشیات برآمد کی گئی۔
تعلیمی اداروں کے اطراف کی جانے والی کارروائیوں میں جی نائن اسلام آباد میں ایک ہوٹل کے قریب ملزم سے 30 گرام وزنی 70 سائیکوٹراپک گولیاں برآمد ہوئیں، جبکہ شامکوٹ ٹول پلازہ، ضلع خانیوال کے قریب ایک خاتون سے 1.2 کلوگرام چرس برآمد کی گئی۔ گرفتار ملزمان نے تعلیمی اداروں کے طلبہ کو منشیات فروخت کرنے کا اعتراف کیا ہےہے۔
مزید پڑھیں: دوطرفہ انسدادِ منشیات تعاون کو مضبوط بنانے کے لیے قطری وفد کا اے این ایف ہیڈکوارٹرز کا دورہ
دیگر کارروائیوں کے دوران کراچی پورٹ پر قطر جانے والے ایک کنٹینر سے جانوروں کی خوراک میں مکس 300 کلوگرام آئس برآمد کی گئی۔ رنگ روڈ پشاور پر پارک کے قریب ایک ٹرک سے 2 کلوگرام آئس برآمد کر کے ملزم کو گرفتار کیا گیا۔ اسی طرح پرانا ٹول پلازہ انڈس ہائی وے کوہاٹ کے قریب ایک ملزم سے 1 کلوگرام چرس برآمد ہوئی، جبکہ رنگ روڈ پشاور میں ایک اور کارروائی کے دوران کوریئر آفس سے لاہور بھیجے جانے والے پارسل سے 100 گرام چرس برآمد کی گئی۔
اے این ایف کے مطابق تمام کارروائیوں کا انسداد منشیات ایکٹ 1997 کے تحت مقدمات درج کر کے مزید تحقیقات کا آغاز کر دیا گیا ہے۔
