اسلام آباد(عرفان حیدر) اے این ایف نے ملک کے مختلف شہروں اور تعلیمی اداروں کے اطراف منشیات فروشوں کے خلاف مؤثر کریک ڈاؤن کرتے ہوئے پانچ کارروائیوں میں چھ ملزمان کو گرفتار کر لیا، جبکہ کارروائیوں کے دوران 21 کروڑ 75 لاکھ روپے سے زائد مالیت کی 200.4 کلوگرام منشیات برآمد کی گئی۔
اٹک میں کالج کے قریب موٹر سائیکل سوار سے 1.2 کلوگرام چرس برآمد ہوئی، اور ملزم نے اعتراف کیا کہ وہ تعلیمی اداروں کے طلباء کو منشیات فروخت کرتا تھا۔ اسلام آباد موٹر وے ٹول پلازہ کے قریب ٹرک سے 15.6 کلوگرام چرس برآمد کی گئی اور دو ملزمان کو گرفتار کیا گیا۔ جی ٹی روڈ برہان، ضلع اٹک میں ریسٹورنٹ کے قریب گاڑی سے 2.4 کلوگرام چرس ملی، جہاں سے دو مزید ملزمان پکڑے گئے۔ حاجی شاہ روڈ اٹک پر موٹر سائیکل سوار سے 1.2 کلوگرام چرس برآمد کی گئی۔ جبکہ ہزار گنجی، ضلع کوئٹہ کے ویسٹرن بائی پاس سے 180 کلوگرام ہیروئن برآمد کی گئی۔
مزید پڑھیں: اے این ایف کا کریک ڈاؤن، 27 کلوگرام سے زائد منشیات برآمد
اے این ایف کے مطابق تمام کارروائیوں کے تحت انسدادِ منشیات ایکٹ 1997 کے تحت مقدمات درج کر کے مزید تحقیقات شروع کر دی گئی ہیں۔
