لاہور(عرفان حیدر) انسداد منشیات فورس (اے این ایف) نے ملک کے مختلف شہروں اور تعلیمی اداروں کے اطراف میں منشیات اسمگلنگ کے خلاف بڑی کارروائیاں کرتے ہوئے 5 خواتین سمیت 10 ملزمان کو گرفتار کر لیا۔

ترجمان اے این ایف کے مطابق چھ مختلف کارروائیوں کے دوران مجموعی طور پر 91.886 کلوگرام منشیات برآمد کی گئیں، جن کی مالیت 1 کروڑ 35 لاکھ روپے سے زائد ہے۔

تعلیمی اداروں کے قریب کارروائیاں

ہری پور کے علاقے ہتار روڈ پر ایک ملزم کے قبضے سے 300 گرام چرس اور 60 گرام آئس برآمد ہوئی۔ ملزم نے دورانِ تفتیش انکشاف کیا کہ وہ تعلیمی اداروں کے طلباء کو منشیات فروخت کرتا رہا ہے۔

اسلام آباد ایئرپورٹ پر بڑی کارروائیاں

اسلام آباد ایئرپورٹ پر دبئی جانے والے ایک مرد اور خاتون کے پیٹ سے مجموعی طور پر 706 گرام وزنی، 99 ہیروئن بھرے کیپسولز برآمد ہوئے۔
ایک اور کارروائی میں ریاض جانے والے مسافر کے پیٹ سے 220 گرام وزنی، 33 کوکین بھرے کیپسولز برآمد کیے گئے۔ دونوں مسافروں کو گرفتار کر کے مقدمات درج کر لیے گئے۔

دیگر کارروائیاں

گجرات میں جی ٹی روڈ پر ایک گاڑی سے 64.8 کلوگرام چرس اور 18.6 کلوگرام افیون برآمد ہوئی۔ کارروائی کے دوران 2 خواتین سمیت 4 افراد کو گرفتار کیا گیا۔
ملتان کے قریب شیر شاہ ٹول پلازہ پر ایک خاتون سے 6 کلوگرام آئس برآمد ہوئی، جبکہ منڈی بہاؤالدین کے علاقے چک بساوا میں ایک گھر سے 1.2 کلوگرام آئس برآمد کر کے ایک خاتون کو گرفتار کر لیا گیا۔

اے این ایف نے تمام مقدمات انسدادِ منشیات ایکٹ 1997 کے تحت درج کر کے مزید تحقیقات کا آغاز کر دیا ہے۔ ترجمان نے کہا کہ منشیات فروشوں کے خلاف زیرو ٹالرنس پالیسی کے تحت کارروائیاں جاری رہیں گی۔