ماسکو(روشن پاکستان نیوز) روسی ٹیکنالوجی اسٹارٹ اپ کمپنی نَیری نے گائیوں کا دودھ بڑھانے کے لیے ان کے دماغ میں نیورو امپلانٹس لگا کر دنیا کی پہلی کامیاب سرجری کی ہے۔
رپورٹ کے مطابق کمپنی نے سرجری کے ذریعے پانچ گائیوں کے دماغ میں ایسے خاص آلے اور ایک اسٹیمولیٹر سر کے پچھلے حصے پر لگایا گیا اور الیکٹروڈز دماغ کے اندر گہرائی تک پہنچائے گئے۔
کمپنی کے مطابق یہ آلے گائے کے دماغ کے اُن حصوں کو برقی لہروں سے متحرک کرتے ہیں جو بھوک، تناؤ اور تولیدی عمل کو کنٹرول کرتے ہیں، یہ تجربات روس کے علاقے سویردلووسک میں کئے گئے اور ابتدائی نتائج کافی حوصلہ افزا قرار دئے گئے۔
کمپنی کے سرمایہ کار الیکسی ماریزا نے کہا کہ ڈیری فارمز دودھ بڑھانے کے لیے پہلے ہی تمام روایتی طریقے استعمال کئے جا چکے ہیں، لیکن اب یہ نئی ٹیکنالوجی دودھ کی صنعت میں انقلابی تبدیلی لا سکتی ہے۔
مزید پڑھیں: یوکرین کے بارے میں فیصلہ امریکہ نہیں ماسکو کرے گا، روس
رپورٹ کے مطابق گائیوں نے سرجری کے دوران ہوش میں رہتے ہوئے یہ عمل برداشت کیا، ان پر کوئی منفی اثر نہیں ہوا اور وہ دوبارہ دودھ دینے کے عمل میں شامل ہو گئیں، اگرچہ کمپنی نے ابھی ڈیٹا جاری نہیں کیا، لیکن ان کا دعویٰ ہے کہ دودھ کی پیداوار میں اضافہ ہوا ہے۔
سائنسدان فی الحال دماغ کے مختلف حصوں کو متحرک کرنے کے لیے مؤثر ترین پروگرام پر کام کر رہے ہیں، کمپنی کے مطابق یہ آلے اتنے کامیابی سے کام کر رہے ہیں کہ انہیں جلد تجارتی سطح پر فروخت کے لیے پیش کیا جا سکتا ہے۔
