دبئی(روشن پاکستان نیوز) ایشیا کپ ٹی ٹوئنٹی 2025 میں پاک بھارت ہائی وولٹیج میچ میں پاکستانی کے اوپنر صائم ایوب نے ایک ناپسندیدہ ریکارڈ اپنے نام کر لیا۔
صائم ایوب اننگز کا آغاز کرنے آئے تو بھارتی آل راؤنڈر ہاردک پانڈیا کی بال پر جیسپریت بمراہ کو آسان کیچ دے بیٹھے اور یوں پہلی ہی گیند پر آؤٹ ہو گئے۔
صائم ایوب ٹی ٹوئنٹی انٹرنیشنل میں 7 ویں مرتبہ صفر پر آؤٹ ہوئے ہیں جس کے بعد وہ ٹی ٹوئنٹی انٹرنیشنل میں سب سے زیادہ مرتبہ صفر پر آؤٹ ہونے والے پاکستانی کھلاڑیوں کی فہرست میں تیسرے نمبر پر آگئے۔
ٹی ٹوئنٹی انٹرنیشنل میں سب سے زیادہ مرتبہ صفر پر آؤٹ ہونے والے پاکستانی کھلاڑیوں میں بابر اعظم، محمد حفیظ اور کامران اکمل بھی تیسرے نمبر ہیں۔
اس فہرست میں سب سے آگے مڈل آرڈر بیٹر عمر اکمل ہیں جو 84 میچز میں 10 مرتبہ بغیر رن بنائے آؤٹ ہوئے۔ ان کے بعد شاہد آفریدی کا نام آتا ہے جو 98 میچز میں 8 بار صفر پر آؤٹ ہوئے۔ 7 مرتبہ صفر پر آؤٹ ہونے والوں میں صائم ایوب (43 میچز)، کامران اکمل (58 میچز)، محمد حفیظ (119 میچز) اور بابر اعظم (128 میچز) شامل ہیں۔
مزید پڑھیں: ایشیا کپ: کرکٹ کی دنیا کا سب سے بڑا پاک بھارت ٹاکرا آج ہو گا
صائم کے صفر پر آؤٹ ہونے سے پاکستان کی بیٹنگ مشکلات کا شکار رہی اور ٹیم مقررہ 20 اوورز میں 9 وکٹوں کے نقصان پر صرف 127 رنز ہی بنا سکی۔
