کراچی(عرفان حیدر سے) اینٹی نارکوٹکس فورس (اے این ایف) کی منشیات کے خلاف جاری مہم میں ایک اور بڑی کامیابی حاصل ہوئی ہے۔ اے این ایف پورٹ کنٹرول یونٹ نے ایک خفیہ اطلاع پر کارروائی کرتے ہوئے سمندری راستے سے بیرونِ ملک آئس اسمگل کرنے کی کوشش ناکام بنا دی۔
ترجمان اے این ایف کے مطابق کارروائی ساؤتھ ایشیا پاکستان ٹرمینل، کراچی پر کی گئی، جہاں آسٹریلیا بھیجے جانے والے ایک کنٹینر کو تحویل میں لیا گیا۔ کنٹینر مصالحہ جات اور فوڈ آئٹمز پر مشتمل تھا، لیکن تلاشی کے دوران اس میں چھپائی گئی 100 کلو 800 گرام میتھ ایمفیٹامائن (آئس) برآمد کر لی گئی۔
تحقیقات سے معلوم ہوا کہ مذکورہ کنٹینر لاہور سے ایک نجی کمپنی کے لیے آسٹریلیا بک کروایا گیا تھا۔ اے این ایف نے کنٹینر اور برآمد شدہ منشیات کو تحویل میں لے کر ملوث ملزمان کی گرفتاری کے لیے تحقیقات کا آغاز کر دیا ہے۔
ترجمان کے مطابق، ملک اور بین الاقوامی سطح پر منشیات، خاص طور پر سنتھیٹک ڈرگز کے خاتمے کے لیے اے این ایف پرعزم ہے۔ منشیات فروشوں کے خلاف ہر سطح پر کریک ڈاؤن جاری ہے، کیونکہ یہ قومی سلامتی کا ایک اہم مسئلہ ہے۔
مزید پڑھیں: اے این ایف کا منشیات فروشوں کے خلاف بڑا کریک ڈاؤن، 239 کلوگرام منشیات برآمد، 8 ملزمان گرفتار
اے این ایف ملک کو منشیات سے پاک بنانے کے لیے دن رات سرگرمِ عمل ہے اور ہر ممکن اقدام کر رہی ہے۔
