اسلام آباد (روشن پاکستان نیوز) پاکستان تحریک انصاف (پی ٹی آئی) نے پنجاب کے 2 حلقوں میں ضمنی انتخاب کے لیے اپنے امیدواروں کا اعلان کر دیا۔

پی ٹی آئی کی سیاسی کمیٹی کے اجلاس میں پنجاب کے 2 حلقوں کے ضمنی انتخاب کے لیے ناموں کو فائنل کیا گیا۔

اجلاس کے بعد جاری کردہ اعلامیہ کے مطابق پنجاب میں قومی اسمبلی کی نشست این اے 66 وزیر آباد سے عین احمد پی ٹی آئی کی حمایت یافتہ امیدوار ہوں گی۔ جبکہ پی پی 87 میانوالی سے منزہ فاطمہ پی ٹی آئی کی حمایت یافتہ امیدوار ہوں گی۔

اعلامیہ کے مطابق ضمنی انتخاب میں دیگر نشستوں کے لیے امیدواروں سے متعلق پارٹی جلد فیصلہ کرے گی۔ جبکہ ضمنی انتخابات کے حوالے سے فیصلہ بہت جلد بانی پی ٹی آئی کو بھی پیش کیا جائے گا۔

یہ بھی پڑھیں:پی ٹی آئی اس حد تک جا چکی کہ قاسم اور سلیمان کو دہشتگردی کا نشانہ بنوانا چاہتے ہیں، فیصل واوڈا

پی ٹی آئی کی سیاسی کمیٹی نے علیمہ خانم کے بیٹوں کی گرفتاری کی مذمت بھی کی۔

اعلامیے کے مطابق بانی پی ٹی آئی نے واضح کیا کہ اپوزیشن لیڈرز کی نامزدگی قانونی آپشنز کے استعمال تک مؤخر کی جائے۔ اور قانونی جنگ میں ناکامی کی صورت میں محمود اچکزئی اور اعظم سواتی اپوزیشن لیڈر ہوں گے۔