اسلام آباد(روشن پاکستان نیوز) سعودی عرب نے اپنی سالانہ روایتی سخاوت کو جاری رکھتے ہوئے ایک اور تحفہ پاکستان کے عوام کے لیے پیش کیا ہے۔ سعودی حکومت کی جانب سے 100 ٹن کھجوریں پاکستان کو خیر سگالی اور یکجہتی کے جذبے کے طور پر دی گئی ہیں۔ یہ عطیہ خادم الحرمین الشریفین شاہ سلمان بن عبدالعزیز آل سعود کی قیادت میں دیا گیا، جو سعودی عرب اور پاکستان کے مابین دوستانہ اور برادرانہ تعلقات کا مظہر ہے۔
اسلام آباد میں سعودی سفارتخانے میں ایک رسمی تقریب کا انعقاد کیا گیا، جہاں سعودی سفیر عزت مآب نوّاف بن سعید المالکی اور کنگ سلمان ہیومینیٹیرین ایڈ اینڈ ریلیف سینٹر پاکستان کے ڈائریکٹر عبداللہ البقمی نے 100 ٹن کھجوروں کا تحفہ کابینہ ڈویژن کے ملٹری ونگ کے ڈائریکٹر جنرل بریگیڈیئر عالمگیر ایوب کے حوالے کیا۔
بریگیڈیئر عالمگیر ایوب نے پاکستان کی جانب سے سعودی قیادت کا شکریہ ادا کیا اور کہا کہ یہ تحفہ دونوں ممالک کے درمیان گہری دوستی اور تعاون کا غماز ہے۔ انہوں نے سعودی قیادت کے پاکستان کے لیے غیر متزلزل حمایت اور فراخدلانہ امداد کو سراہا۔
یہ تحفہ سعودی عرب اور پاکستان کے تعلقات کی پختگی کو مزید مستحکم کرتا ہے اور دونوں ممالک کے مابین تعاون اور خیر سگالی کے جذبات کو اجاگر کرتا ہے۔
مزید پڑھیں: سعودی عرب میں ویزا اور اقامہ کی تجدید کی نئی فیس مقرر
