اسلام آباد(روشن پاکستان نیوز) محکمہ موسمیات نے کل سے ملک کے مختلف علاقوں میں موسلا دھار بارشوں کی پیشگوئی کر دی۔
یکم جولائی سے بارشوں کا مغربی سسٹم ملک کے بالائی علاقوں میں داخل ہونے کا امکان ہے،محکمہ موسمیات نے کل سے پری مون سون بارشوں کی پیشگوئی کی ہے۔
موسم کا حال بتانے والوں کے مطابق یکم سے 6جولائی تک لاہور، اسلام آباد، راولپنڈی، مری میں بارشیں ہونے کی توقع ہے، گلیات،کشمیر ، گلگت بلتستان اور سندھ میں بھی موسلادھاربارشوں کا امکان ہے۔
محکمہ موسمیات کا کہنا ہے کہ بارشوں کے باعث ندی نالوں میں طغیانی اور نشیبی علاقوں میں اربن فلڈنگ کا خطرہ ہے، محکمہ موسمیات کے ماہرین کا کہنا ہے کہ یکم جولائی سے ملک کے مختلف اضلاع میں پری مون سون بارشوں کا سلسلہ شروع ہونے کا امکان ہے۔
اس سال بارشوں کا باقاعدہ آغاز ملک کے شمال مشرقی پنجاب اور کشمیر کے علاقوں سے ہونے کی امید ہے، جس کے بعد یکم جولائی سے ملک کے بالائی شمالی حصوں اور پنجاب کے شمال مشرقی علاقوں میں بارشیں ہونے کی توقع ہے۔
این ڈی ایم اے نے وارننگ جاری کرتے ہوئے کہا ہے کہ ملک میں جاری شدید گرمی کی وجہ سے پہاڑوں پر جمی برف اور گلیشیر بہت تیزی سے پگھلنا شروع ہو گئے ہیں، بارشوں کی وجہ سے اچانک گلیشیر پگھلنے، پہاڑی جھیلیں پھٹنے، سیلاب آنے اور لینڈ سلائیڈنگ کا بہت بڑا خطرہ ہے۔
کراچی میں بارش کب ہوگی؟ محکمہ موسمیات نے بتا دیا
این ڈی ایم اے کے مطابق گلگت بلتستان، خیبر پختونخوا اور آزاد کشمیر کے علاقوں میں گلیشیائی برف پگھلنے سے وہاں کے دریاؤں اور ندی نالوں میں پانی کا بہاؤ بہت تیز ہو جائے گا اور پانی کی سطح اچانک بلند ہو سکتی ہے۔
این ڈی ایم اے نے خبردار کرتے ہوئے سیاحوں، راستوں سے گزرنے والے مسافروں اور وہاں کے مقامی لوگوں کو سخت ہدایت کی ہے کہ وہ گلیشیرز سے نکلنے والے ندی نالوں اور دریا کے کناروں سے دور رہیں تاکہ کسی بڑے حادثے سے محفوظ رہا جا سکے۔
