کراچی( روشن پاکستان نیوز) پاکستان نے جنوبی افریقا کو شکست دیکر سہ ملکی سیریزکے فائنل کیلئے کوالیفائی کرلیا۔
پاکستان نے 353 رنز کا ہدف 4 وکٹوں کے نقصان پر49 ویں اوور میں حاصل کیا،پاکستانی اننگز کی خاص بات کپتان محمد رضوان اور نائب کپتان سلمان آغا کی شاندار سنچریاں تھیں ،کپتان محمد رضوان کی سنچری میں 7چوکے ،3 چھکے شامل تھے ،انہوں نے نے 106گیندوں پر سنچری مکمل کی،یہ محمد رضوان کی ون ڈے کیرئیر کی چوتھی سنچری ہے۔
نائب کپتان سلمان علی آغا نے 13 چوکوں کی مدد سے سنچری بنائی،انہوں نے87گیندوں پر سنچری اسکور کی،یہ سلمان علی آغا کی ون ڈے کیرئیر کی پہلی سنچری ہے،فخر زمان 41،بابراعظم 23اور سعود شکیل 15رنز بناکر آؤٹ ہوئے
قبل ازیں سہ فریقی سیریز کے اہم میچ میں جنوبی افریقا نے پاکستان کو جیت کیلئے 353 رنز کا ہدف دیا،کراچی میں کھیلے جارہے میچ کا ٹاس جنوبی افریقا نے جیتا اور پہلے بیٹنگ کرنے کا فیصلہ کیا، جنوبی افریقا کے بیٹرز نے پاکستانی بائولرز کی کھل کر دھلائی کی۔
جنوبی افریقا نے 5وکٹوں کے نقصان پر 352رنز بنائے،کلاسن 87رنز بناکر نمایاں رہے،میتھیو بریز نے 83اور ٹیمبا باووما نے 82 رنز کی اننگز کھیلی۔
شاہین شاہ آفریدی نے 2کھلاڑیوں کوآؤٹ کیا،نسیم شاہ اور خوشدل شاہ کے حصے میں ایک ایک وکٹ آئی ، جبکہ جنوبی افریقا کا ایک بیٹر رن آئوٹ ہوا۔
نائب کپتان سلمان علی آغا پلیئر آف دی میچ قرارپائے ،انہوں نے کہا کہ ہدف بڑا تھا مگر بہتر کھیل کی وجہ سے کامیابی ملی،کراچی کی پچ کا بھرپور فائدہ اٹھایا،خوشی ہے کہ پرفارمنس ٹیم کے کام آئی،جس پلان کے تحت بیٹنگ کی وہ کامیاب ہوا۔
مزید پڑھیں: بھارت کے جسپریت بمرا آئی سی سی ٹیسٹ کرکٹر آف دا ایئر قرار
سہ ملکی سیریز کا فائنل جمعے کو پاکستان اور نیوزی لینڈ کے درمیان کراچی میں ہی کھیلا جائیگا۔
