اسلام آباد(عرفان حیدر) اینٹی نارکوٹکس فورس (اے این ایف) نے تعلیمی اداروں کے اطراف اور ملک کے مختلف شہروں میں منشیات اسمگلنگ کے خلاف بھرپور کریک ڈاؤن کرتے ہوئے 9 کارروائیوں کے دوران افغان نیشنل سمیت 8 ملزمان کو گرفتار کر لیا۔ کارروائیوں میں 50 کروڑ 89 لاکھ روپے سے زائد مالیت کی 6608.3 کلوگرام منشیات برآمد کی گئیں۔
تعلیمی اداروں کے قریب کی جانے والی کارروائی میں چونگی نمبر 26 اسلام آباد کے قریب ایک ملزم کے قبضے سے 9.6 کلوگرام چرس برآمد ہوئی۔ گرفتار ملزم نے تعلیمی اداروں کے طلباء کو منشیات فروخت کرنے کا اعتراف کیا۔
دیگر کارروائیوں میں چکلالہ گیریژن راولپنڈی میں واقع ایک کوریئر آفس سے برطانیہ سے آنے والے پارسل میں ویپ کارٹرج کے ذریعے 150 گرام کینابیس برآمد کی گئی۔ لاہور کے ایک کوریئر آفس میں برطانیہ بھیجے جانے والے پارسل سے تندور میں چھپائی گئی 5 کلوگرام آئس اور 5 کلوگرام افیون برآمد کر کے ملزم کو گرفتار کیا گیا۔
کراچی کے علاقے حب ریور روڈ پر ایک مدرسے کے قریب گاڑی سے 10 کلوگرام ہیروئن برآمد ہوئی جبکہ شاہ رکن عالم کالونی ملتان میں دو ملزمان سے 4 کلوگرام آئس اور 250 گرام افیون ضبط کی گئی۔
اسی طرح ترکئی ٹول پلازہ کے قریب ایک ملزم سے 2.4 کلوگرام چرس، پڑی بنگلہ ڈسٹرکٹ گلگت کے قریب 600 گرام چرس، کارخانو مارکیٹ جمرود روڈ پشاور کے قریب افغان نیشنل سے 300 گرام آئس برآمد کی گئی۔ نوکنڈی کے علاقے میں جھاڑیوں میں چھپائی گئی 6571 کلوگرام چرس بھی برآمد کر لی گئی۔
تمام کارروائیوں کا مقدمات انسداد منشیات ایکٹ 1997 کے تحت درج کر کے تحقیقات کا آغاز کر دیا گیا ہے۔
