کینٹکی(روشن پاکستان نیوز) امریکی ریاست کینٹکی میں کارگو طیارہ گر کر تباہ ہونے کے نتیجے میں 4 افرادہلاک اور 11 زخمی ہو گئے۔ جبکہ کئی افراد لاپتہ ہیں۔
امریکی میڈیا کے مطابق طیارہ لوئی ول ایئرپورٹ سے اڑان بھرنے کے بعد گر کر تباہ ہوا، حادثے کے بعد متعدد عمارتوں میں آگ بھڑک اٹھی۔
لوئی ول کے میئر کے مطابق حادثے کے وقت کارگو طیارے میں 2 لاکھ 80 ہزار گیلن ایندھن موجود تھا۔ طیارہ امریکی شہر ‘ہونولولو’ کے ڈینیئل کےانوئے انٹرنیشنل ائیرپورٹ کی جانب جا رہا تھا۔
مزید پڑھیں: کینیا میں طیارہ گر کر تباہ، تمام مسافروں کی ہلاکت کا خدشہ
سوشل میڈیا پر وائرل ویڈیو میں طیارہ گرنے کے بعد بڑے پیمانے پر آگ لگنے اور دور دور تک دھواں اٹھتا دکھائی دے رہا ہے۔
حادثے کے بعد ایئرپورٹ سے تمام آنے اور جانے والی پروازیں معطل کر دی گئیں۔ امریکی حکام نے ائیرپورٹ سے 5 میل دورعارضی پناہ گاہیں قائم کرنے کا حکم دیدیا۔ فوری طور پر حادثے کی وجہ معلوم نہ ہوسکی۔ امریکی نیشنل ٹرانسپورٹ سیفٹی بورڈ نے تحقیقات کا آغاز کر دیا ہے۔
