اسلام آباد(روشن پاکستان نیوز) آپریشن’’بُنْيَانٌ مَّرْصُوْص‘‘ کی کامیابی پر ملک بھر میں جشن منایا گیا اور مٹھائیاں تقسیم کی گئیں۔
بھارتی جارحیت کا منہ توڑ جواب دینے پر افواج پاکستان کو ملک بھر میں خراج تحسین پیش کیا گیا۔ جبکہ اظہار یکجہتی کیلئے چھوٹے بڑے شہروں میں ریلیاں نکالی گئیں۔
شہر شہر، گلی گلی افواج پاکستان کو خراج تحسین پیش کرنے کے لیے ریلیوں میں عوام کی کثیر تعداد نے شرکت کی۔ افواج پاکستان کے جوانوں پر پھولوں کی پتیاں نچھاور کی گئیں اور پھولوں کے ہار پہنائے گئے۔
لکی مروت میں فتح کی خوشی میں عوام نے قومی پرچم اٹھا کر پاک فوج زندہ باد کے نعرے لگائے۔ جبکہ شمالی وزیرستان باجوڑ میں بھی بھارتی جارحیت کے خلاف اور افواج پاکستان کی فتح پر ریلی کا انعقاد کیا گیا۔
یہ بھی پڑھیں: بھارتی 15 مقامات پر پاکستانی حملےکی خبر جھوٹی ہے، پاکستان حملہ کریگا تو نظر بھی آئیگا، گونج بھی سنائی دیگی: ترجمان پاک فوج
خیبر پختونخوا کے علاقوں پشاور کینٹ، چترال، ڈیرہ اسماعیل خان، ٹانک، سوات، مہمند، نوشہرہ، قلعہ بالا حصار اور مردان میں عوام کی بڑی تعداد بھارت کے خلاف فتح کا جشن منانے سڑکوں پر آگئی۔ اور بہادر مسلح افواج کو خراج تحسین پیش کیا گیا۔
پنجاب، سندھ اور بلوچستان کے بھی بیشتر شہروں میں ریلیوں کا انعقاد کیا گیا اور شہریوں میں مٹھائیاں تقسیم کی گئیں۔ ریلیوں میں ہر مکتبہ فکر کے افراد نے شرکت کی۔
ملک بھر میں نکالی گئی ریلیوں کے شرکا نے اللہ کی ذات کا اس شاندار فتح پر شکر ادا کیا اور افواج پاکستان کے حق میں نعرے لگائے۔
