راولپنڈی(روشن پاکستان نیوز) پاک فوج نے کہا ہے کہ بنوں کینٹ پر حملے کو ناکام بنا کر 4 خودکش حملہ آوروں سمیت تمام 16 دہشتگردوں کو ہلاک کیا جبکہ جھڑپ میں 5 جوان بھی شہید ہوئے۔

آئی ایس پی آر کے بیان میں کہا گیا ہے کہ خوارجی عناصر نے بنوں کنٹونمنٹ پر دہشتگرد حملے کی کوشش کی تاہم سکیورٹی فورسز نے فوری جوابی کارروائی کرتے ہوئے دہشتگردوں کے مذموم عزائم کو ناکام بنا دیا۔

مزید پڑھیں: ڈونلڈ ٹرمپ نے یوکرین کیلئے تمام فوجی امداد روک دی

آئی ایس پی آر کے مطابق خودکش دھماکوں سے چھاؤنی کی دیوار کا ایک حصہ گر گیا، دھماکوں اور فائرنگ سے قریب واقع ایک مسجد اور ایک رہائشی عمارت شدید متاثر ہوئیں، مسجد اور عمارت کے متاثر ہونے سے 13 شہری شہید اور 32 زخمی ہو گئے۔

آئی ایس پی آر نے مزید بتایا کہ خفیہ اطلاعات سے ثابت ہوا ہے کہ حملے میں افغان شہری ملوث تھے، شواہد ہیں حملے کی منصوبہ بندی اور قیادت افغانستان میں موجود خوارج سرغنوں نے کی۔

پاک فوج نے کہا کہ افغان عبوری حکومت اپنی ذمہ داریاں نبھائے اور اپنی سرزمین پاکستان کے خلاف استعمال ہونے سے روکے، پاکستان سرحد پار سے آنے والے خطرات پر ضروری اقدامات کرنے کا حق محفوظ رکھتا ہے۔