کراچی(روشن پاکستان نیوز) کراچی میں رواں برس کے ابتدائی 2 ماہ میں اسٹریٹ کرائمز کے 10 ہزار سے زائد واقعات رپورٹ ہوچکے ہیں۔
تفصیلات کے مطابق سال 2025کے پہلے 2 ماہ کے دوران شہر میں اسٹریٹ کرائم کے 10ہزار 356 واقعات رپورٹ ہوئے۔
پولیس رپورٹ میں بتایا گیاکہ 2 ماہ کے دوران 12شہری ڈکیتی مزاحمت پر قتل اور 41 زخمی ہوئے جب کہ اس دوران 2806 شہریوں سے موبائل فون چھینے گئے۔
رپورٹ کے مطابق رواں برس28 فروری تک شہر سے 306 گاڑیاں اور7 ہزار244موٹر سائیکلیں چھینی و چوری کی گئیں۔
رپورٹ میں مزید بتایا گیاکہ رواں برس موبائل فون چھیننے کی یومیہ شرح 48.4،گاڑیوں کی چوری اور چھیننے کی 5.3 جب کہ موٹر سائیکلیں چھیننے اور چوری کی یومیہ شرح 124.9 رہی۔
پولیس کے مطابق سال 2024کے پہلے 2 ماہ میں اسٹریٹ کرائم کے 14ہزار 419 واقعات رپورٹ ہوئے تھے اور 2024کے پہلے 2 ماہ کے مقابلے میں رواں برس اسٹریٹ کرائم کی شرح 28.18فیصد کم ہے۔
مزید پڑھیں: ڈی آئی جی ٹریفک کراچی سے آل کراچی ٹرانسپورٹرز ایسوسی ایشن کے وفد کی ملاقات
پولیس حکام کا بتانا ہے کہ 2024 کے پہلے 2 ماہ میں ڈکیتی مزاحمت پر 32 افراد قتل اور 99 زخمی ہوئے تھے۔
پولیس کے مطابق گزشتہ برس جنوری اور فروری میں شہریوں سے 4 ہزار 120 موبائل فون چھینے گئے تھے جب کہ 335گاڑیاں اور 9 ہزار 964موٹر سائیکلیں چھینی اور چوری کی گئی تھیں۔
