اسلام آباد(روشن پاکستان نیوز) پیرس اولمپکس میں طلائی تمغہ جیتنے والے ارشد ندیم کے پاس ایک ہی بین الاقوامی معیار کی جیولن ہے جو اس وقت خراب حالت میں ہے۔ دوسری جانب ان کے حریف انڈیا کے نیرج چوپڑا کے لیے حکومت نے ٹوکیو اولمپکس سے پہلے 177 جیولن خریدے تھے۔

وسائل کی کمی کے حوالے سے ارشد کے بھائی شاہد ندیم کا کہنا تھا کہ وسائل نہیں ہیں اور ہمیں پتا تھا ارشد کو وسائل کی نہیں دعاؤں کی ضرورت ہے۔

شاہد بتاتے ہیں کہ ارشد کو ہم گاؤں میں ’’روسی ٹریکٹر‘‘ بلاتے ہیں کہ اللہ نے اس میں بہت طاقت رکھی ہے۔اس کی وضاحت کرتے ہوئے وہ بتاتے ہیں کہ باقی جتنے بھی ٹریکٹر ہوتے ہیں ان سب کی وزن کھنچنے کی ایک حد ہوتی ہے مگر روسی ٹریکٹر کی کوئی حد نہیں ہوتی۔ اس کے پیچھے جتنا بھی وزن لگا دو وہ کھنچ کر لے جاتا ہے۔

ارشد نے اولمپکس میں روسی ٹریکٹر کی مثال کی دوبارہ یاد دلا دی کہ میں روسی ٹریکٹر ہوں، میں نے ایسا زور لگانا ہے اور پاکستان کے لیے اولمپکس کھینچ کر لے آنا ہے۔

مزید پڑھیں: یووراج سنگھ اور روی شاستری کی بھی ارشد ندیم کی تاریخی کامیابی پر مبارک باد

انھیں یہ تو امید تھی کہ ان کا بھائی گولڈ میڈل لے گا لیکن انھوں نے یہ نہیں سوچا تھا کہ وہ تاریخ بھی رقم کرے گا۔