اسلام آباد(راجہ اسرارحسین) بے زبان جانوروں کو بوری میں بند کرکے تشدد کرنے والے 2 گرفتار افرادکو عدالت نے رہا کرنے کا حکم دیدیا۔
تفصیلات کے مطابق گرفتارملزمان کے وکیل نے میڈیا سے بات چیت کرتے ہوئے بتایاکہ میرے دونوں موکل کو عدالت نے رہا کرنے کا حکم دیدیا ہے ۔
وکیل دفاع کا کہنا تھا کہ انشان اشرف المخلوقات ہے اور اللہ تعالیٰ نے انسان پربرتری دی ہے،انسان سےغلطی ہوجاتی ہے ۔
اس سے قبل ااسلام آباد پولیس کے ترجمان نے ایک جاری بیان میں بتایا کہ واقعہ غوری ٹاؤن کے علاقہ میں پیش آیا، گرفتار کیے افراد نے بے زبان جانوروں پر تشدد کی ویڈیو سوشل میڈیا پر بھی شیئر کی جو وائرل ہوگئی۔ ملزمان نے کتوں پر تشدد کیا تھا۔
ترجمان نے بتایا کہ اسلام آباد پولیس کی اینیمل ویلفیئر سروسز نے بروقت کارروائی کرتے ہوئے وقوعہ کا مقدمہ تھانہ کھنہ میں درج کرکے ملزمان کو گرفتار کیا ہے۔
پولیس کی جانب سے ریسکیو کی ویڈیو جاری کی گئی ہے جس میں دیکھا جاسکتا ہے کہ پولیس کا عملہ متاثرہ کتوں کو اپنی گاڑی میں ڈال کر محفوظ مقام پر منتقل کررہا ہے۔
واضح رہے کہ اسلام آباد پولیس نے مختلف محکموں اور گھروں سے ریٹائر ہونے والے سمیت جانوروں کی حفاظت کے لیے پولیس اینیمل ویلفیئر سروسز کا آغاز کیا تھا۔
