کراچی(روشن پاکستان نیوز) محکمہ موسمیات نے وسطی اور بالائی سندھ کے لیے ہیٹ ویو کا الرٹ جاری کرتے ہوئے خبردار کیا ہے کہ گرمی کی یہ شدید لہر 3 مئی تک برقرار رہ سکتی ہے۔
محکمہ موسمیات کی پیشگوئی کے مطابق ان علاقوں میں درجہ حرارت معمول سے 4 سے 6 ڈگری سینٹی گریڈ زیادہ رہنے کا امکان ہے۔ شدید گرمی سے سب سے زیادہ متاثر ہونے والے اضلاع میں جامشورو، دادو، شہید بے نظیر آباد، کشمور، گھوٹکی، سانگھڑ، خیرپور، نوشہرو فیروز، جیکب آباد، لاڑکانہ اور سکھر شامل ہیں۔
صوبائی دارالحکومت کراچی کے حوالے سے محکمہ موسمیات کا کہنا ہے کہ شہر میں دن کے وقت گرمی کی شدت تو برقرار رہے گی، تاہم یہاں فی الحال ہیٹ ویو کا کوئی امکان نہیں ہے۔ کراچی میں زیادہ سے زیادہ درجہ حرارت 36 ڈگری تک رہنے کی توقع ہے۔
محکمہ موسمیات کی ملک بھر میں بارشوں کی پیشگوئی
انتظامیہ اور طبی ماہرین نے شہریوں کو ہدایت کی ہے کہ وہ بلا ضرورت دھوپ میں نکلنے سے گریز کریں اور احتیاطی تدابیر اختیار کریں۔ طبی ماہرین کا کہنا ہے کہ ہیٹ اسٹروک سے بچنے کے لیے پانی کا استعمال زیادہ سے زیادہ کیا جائے اور سر ڈھانپ کر رکھا جائے۔
