اسلام آباد (10 اگست): مرکزی امام حسین کونسل کی مجلسِ عاملہ کا اجلاس چیئرمین ڈاکٹر مہدی کی زیرِ صدارت اسلام آباد میں منعقد ہوا، جس میں وفاقی دارالحکومت کی مختلف دینی تنظیموں کے نمائندوں نے شرکت کی۔ اجلاس میں مطالبہ کیا گیا کہ 28 صفر، یومِ وصالِ رسولِ اکرم ﷺ کے موقع پر ملک بھر میں عام تعطیل کی جائے۔
اجلاس میں کہا گیا کہ قومی مشاہیر کے ایام پر عام تعطیل کی جاتی ہے، تاہم یومِ وصالِ رسول ﷺ کے حوالے سے عوام میں آگاہی بڑھانے کی ضرورت ہے۔ شرکا نے صدرِ مملکت، وزیراعظم، آرمی چیف، وزیرِ داخلہ اور وزیرِ مذہبی امور سے مطالبہ کیا کہ اس سلسلے میں فوری اقدامات کیے جائیں۔
اجلاس میں اعلان کیا گیا کہ 12 اگست بروز بدھ، دوپہر 2 بجے راولپنڈی کے پرل کانٹی نینٹل ہوٹل کے بینکوئٹ ہال میں نانا نواسہ عالمی کانفرنس منعقد ہوگی، جس میں تمام مکاتبِ فکر کے جید علما، مشائخ اور اسکالرز خطاب کریں گے۔
اجلاس میں علامہ پیر حسنین الدین شاہ کے انتقال پر تعزیتی قرارداد بھی متفقہ طور پر منظور کی گئی۔ قرارداد میں انہیں اتحادِ امت کی علامت قرار دیتے ہوئے خراجِ عقیدت پیش کیا گیا اور بتایا گیا کہ ان کے شاگردوں کی تعداد 40 ہزار سے زائد تھی۔ اجلاس کے شرکا نے مرحوم کے لیے دعائے مغفرت اور لواحقین کے لیے صبرِ جمیل کی دعا بھی کی۔
